早幾日大使返到公司，見到案頭放咗一封粉紅色嘅信，寫明畀「暖流愛心大使」收，拆開一睇，原來係幾個正喺石壁監獄服刑嘅人士寄嚟，表揚早前因為照顧非典型肺炎病人而染病，最後因公殉職嘅屯門醫院護士「佳哥」劉永佳。
卡面簡簡單單寫上「醫護先鋒永垂不朽」八個字（圖），但就盡顯佢哋對「佳哥」最崇高嘅敬意，總共有八個人簽名。另外，信中提到：「佳哥堅守醫護崗位，無懼病毒，捨己忘我為病人服務的高尚情操」，佢哋重希望佳哥家人同香港市民，將對佳哥嘅懷念化為力量，延續佢偉大嘅精神。
其實捨生取義嘅醫護勇士又豈只佳哥一人？我諗呢班朋友寄出呢封信嘅時候，發夢都估唔到佳哥走咗幾日之後，另外兩名醫護人員謝婉雯醫生同健康服務助理鄧香美亦先後喺對抗「沙士」呢場戰役中倒下，令全城市民同聲一哭。
我哋做慈善基金其實都幾矛盾，既唔想咁旺﹙即係多人死、多人傷啦！﹚，但又好想有多啲求助Cases，等我哋可以做多啲好事，幫多啲人，好似呢次非典天災，大使做咗咁多年基金，都未見咁大劑，呢邊廂公公婆婆、綜援家庭冇錢買「抗炎三寶」，我哋撥咗一百萬去派都話未夠，嗰邊廂因為SARS影響令到失業、減薪、冇工開，最後搞到欠租欠水欠電嘅家庭實在唔少，短短一星期，社聯嘅「抗炎助人短期援助計劃」已經撥咗超過百幾萬，幫咗二百幾個家庭，我哋睇到呢個需要，作為支持嘅團體亦都率先撥咗一百萬支持，但需要仍然好大，你慷慨捐助會顯得好有意義。