英國第四頻道電視台今年二、三月間設網投票，讓觀眾選出一百位差勁英國人。首相貝理雅排名第一，大胸肺女星佐敦跟住，第三位是曾經在人民大會堂門口跣到一仆一碌的戴卓爾夫人。曼聯領隊費爺曾經飛起波砵，踢傷碧咸，排第七。碧咸亦上榜，以萬人迷姿態排名91，僅比走後門買平樓的首相夫人彭雪玲相差兩個馬位。同樣是夫妻檔上差勁榜的，除了首相兩公婆，碧咸的巴辣老婆排十三。英女王家門不幸，一家三口入選，老虔婆與裙腳仔的王室老土形象創新低。
假如香港也來個差勁選舉投票，情況約略可以估計。抗非典新聞發佈會上，幾次心不在焉開口說「du以輕生」的董特首，一定跑贏大市，坐硬第一。因為董特首經常反覆強調「一步一步」，所以董1A亦步亦趨，緊貼住排第二位。董特首是人見人讚的好人，不容否認。但他的治港能力，的的確確勁差，成績表見晒紅，治港咁耐，差咁耐，想做好心，唔畀大交叉佢，都會俾雷劈！然則，董太又差乜呢？真是多此一問！當然係，乜都唔差，淨差──勁！
差勁與勁差的人上榜，未必有反省作用，都係得個睇字。因此估計最多人選入圍的，是「勁差」足電、全裸替台灣《蘋果日報》做一咬上癮宣傳的鍾麗緹！