近排「沙士」疫情受控，卡拉OK又見人氣，民主黨噚日就約埋經濟發展及勞工局局長葉澍堃去唱K。開頭有份去嘅肥仔李華明、單仲偕唔識死，猛咁點歌潤老董，一時《沉默是金》，一時又話啲歌「膚淺」，搞到葉局長鬼咁尷尬，猛叫「唔好講政治喇」。後來佢哋拎咪套玩，一時間民主黨叫葉局長「唔好亂借套」，葉局長回敬一句「我有私家套」，句句抵死，語帶雙關。
後來局長搵咗首蔡楓華嘅《倩影》唱，八方問佢為乜搵首蔡楓華，佢好抵死咁話：「李華明鍾意扮蔡楓華，我咪扮李華明！」順帶一提，臨走時成班攝記竟然喺卡拉OK入面困𨋢，要勞動消防員開門，可謂始料不及。
﹙圖﹚肥仔明（左）爭咪唔夠葉澍堃同涂謹申（右）手快，惟有擘大喉嚨伴唱啦。黃冠華攝
傳真︰2623-9278
電郵︰