上周，恒指5日計埋共微升9點，收9093，連續幾日都未能企穩喺九千二以上。由上月25日低位起計，恒指已彈升762點，唞唞氣消化吓好應該，但由於沙士疫情似漸受控制，加上美國股市強勁帶住，港股亦唔似會大幅回落。所以諗吓當恒指回試九千邊邊之時，趁低買啲恒指Call輪，揀啲大成交嘅埋手，對象有9723、9750、9767、9784，其中9723溢價最低，得2.4%，槓桿率最細，但亦有17.8倍，爆炸力一啲都唔弱。
地產股如果回落多少，亦可以諗吓啲地產股Call輪，新地輪諗9799，10月到期，現價26.5仙，溢價11.9%槓桿率14.4倍；長實輪揀9764，9月到期，現價20.9仙，溢價12.8%，槓桿率21.7倍；恒地輪揀9787，明年2月夠鐘，溢價13.8%，槓桿率9.8倍。新世界（017）冇Call輪喺市場買賣，冇得揀。
中銀（2388）係移動緩慢嘅銀行股，最近由7.55元彈上8.05元，收8元，波幅細過其他銀行股，隻Call輪9462已經平水，而槓桿率則有11.1倍，即係話每當正股郁1%，隻輪就跟住郁11.1%。可以諗吓當正股回落兩個價位之時，吼低買9462。中銀其他Call輪，幾乎隻隻成交空白，唔使打佢哋主意。
章盛