曼聯球星碧咸（DavidBeckham）形象百變就係人都知，佢間中就鍾意換吓髮型，難怪人人話佢係潮流先驅。啱啱捧咗個聯賽冠軍嘅碧咸，早兩日去法國度假期間，又俾人影到佢轉新look，不過今次佢成個頭鬢晒辮仔，俾英國傳媒笑佢十足十寶黛麗（BoDerek）喺七九年嗰套《十》嘅髮型一樣，總之就難頂啦！
話說碧咸同佢老婆前兩日喺法國嘅尼斯搞咗個名人聚會，當日重約咗伊莉莎伯凱莉（ElizabethHurley）同艾頓莊（EltonJohn）一齊食lunch，據目擊嘅記者話，當日凱莉同艾頓莊見到碧咸個新髮型之後，即刻笑到碌地，難得碧咸同佢老婆一啲都唔介意，重一臉得戚㖭！
曾經以中間分界、Mohawk頭、光頭以至戴頭箍見人嘅碧咸，今次聽講花咗成五千五蚊港紙同四個鐘嚟整呢個新髮型，有人話不嬲都鍾意聽rap嘅碧咸擺明想學黑人，改玩hiphoplook，不過佢將個頭搞成咁，我羅拉話佢似個乸型多啲！