呢排人人談病色變，八方噚日聽到九鐵行政總裁楊啟彥中咗招，第一時間問候佢老哥，究竟乜嘢情況。
原來佢唔係中咗特區綜合症SARS，而係第七條神經線發炎，搞到個嘴無端端向左邊歪咗少少。好彩呢個問題只係暫時性，醫生話大約五至六個禮拜就會好番，叫佢唔使擔心。
八方笑佢病得合時，因為帶住個口罩，咪冇人知個口歪咗囉！當然咁樣唔係楊官風格，因為佢最唔鍾意人遮遮掩掩，做人唔得正大光明。
另邊廂，兩鐵合併在即，蘇澤光同佢都齊齊喺年底唔撈，咁由邊個收拾呢個局面好呢？楊官就再三聲明，唔好再搞佢。
咁田二少田北辰有冇挽留，請佢再坐一會呢？楊官話未有所聞。其實對於楊啟彥嚟講，有乜嘢風浪未見過吖，都係時候功成身退，咪等二少顯神通囉。
對於佢啲後輩學佢去打信和黃志祥嘅工，真係未知艱難矣，當日楊官在信和三年，雖然為老闆double咗營業額，但係始終都頂唔住，最後唔走唔得。
傳真︰2623-9278
電郵︰