沙士風暴打亂咗好多公司的大計，原本想上市的就暫緩，想搞路演的則由於外國芬佬怕沙士唔肯見人，終於乜鬼活動都停晒。
不過，近排沙士問題好似冇咁猖獗，幾隻比較大的工業股，連大股東舊股都批得出，有芬佬肯接貨。上周五黛麗斯（333）其中一名主要股東AIG，又成功配售所持股份，反映芬佬仍然對工業股有興趣。
經紀黃話知道好多Size稍細的工業股都想搞活動催谷，如果市場反應好，會順便抽埋水，好似亞洲鋁業（930）咁，3月份公布中期業績後，股價一度表現唔錯，最高見過0.87元，但冇幾耐因爆發沙士事件，股價一度回落至0.73元，但亞鋁近排股價又再拾級而上，上周五再微升1.25%，收0.81元，最令人矚目就係2972萬股成交中，有一手2000萬股造0.79元的大手上板，好明顯係芬佬買貨之故。
經紀黃又話，據聞亞鋁稍後會做些少投資者推介工作，或者對股價有所幫助，不妨留意走勢。
慕容小初