禮拜六兩場西甲波齊齊開下盤，兩支主隊拉科魯尼亞同桑坦德，不約而同香咗畀華倫西亞及馬體會，大吹冷風，令我求大俠都大打冷震。話時話，呢兩場波有一共通點，就係兩支客軍都反底，華倫同馬體會之前幾周踢到不知所謂，但係佢哋今次就將「波係圓」嘅道理發揮到淋漓盡致，連大勇嘅拉科，以及賽前六場聯賽不敗嘅桑坦德都要中伏，唔通真係物極必反。之不過，今次就難唔到本報名家吾中，佢喺禮拜六嘅全日攻略貼中馬體會反底，不愧為榜首，係唔同啲嘅。
拉科輸咗呢場波之後變得好被動，因為皇蘇同皇馬都唔係人咁品。呢三隊波今屆喺輪流做一哥，確又係好睇過其他英意德三國聯賽。各位波友，西甲冠軍隨時踢到最後一周先至有真命天子，所以話：季尾波，睇西甲波係啱嘅。
咪以為淨係我哋東方人迷信，原來啲歐洲佬都一樣。AC米蘭已經宣布希望爭取今個月二十八號歐冠盃決賽對祖雲達斯時，可以着白衫比賽。因為佢哋響八十至九十年代三次奪得歐冠盃錦標，原來都係着白衫出賽喎。即管睇吓AC能否如願嘞。
羅馬傷兵多益AC雙料？
講開AC，佢哋呢排真係好運，繼歐冠盃決賽對手祖雲達斯有尼維特停賽後，估唔到禮拜二意大利盃決賽對手羅馬又傷兵纍纍。羅馬響上個禮拜六和基爾禾場波，有前鋒蒙迪拿同埋中場利馬受傷，加埋養緊傷嘅托迪都未必踢到禮拜二場波。唔通AC真係有運攞「雙料」？
重記唔記得法國名將迪甘斯？佢曾以法國隊長身份捧九八世界盃同二千年歐洲國家盃；做咗教練後，冇乜人氣，但佢日前就帶領摩納哥喺決賽打敗索塞斯，攞咗法國聯賽盃，雖然係盃仔，總好過冇。𠵱家摩納哥喺法甲只落後榜首里昂兩分，話唔定攞埋冠軍㖭！
維拉同泰萊解約後，唔少人士有意頂上，其中奧拉利就已經同維拉主席艾利斯見過面。已經待業一季嘅奧拉利，對英超聯瞭如指掌，季初本報記者訪問佢時，預測曼聯可重奪英超冠軍，同雲尼斯達羅攞神射手獎，結果中晒，睇嚟維拉揀新帥有得諗。
喺季前甚至季後賽初期，幾乎個個NBA球迷都諗住最精采嘅西岸決賽，非湖人對帝王莫屬，就連大小莊家都睇好呢兩隊係今年嘅奪標大熱，點知繼湖人爆冷俾馬刺踢出局後，噚日帝王又俾小馬打抵，今年西岸決賽變成咗「雙馬」嘅德州打吡戰，搞到全世界嘅球迷同莊家大跌眼鏡，𠵱家最開心相信喺買重呢兩隊入決賽嘅球迷。