三十五歲的張家輝與三十八歲的關詠荷拍拖十二年，今年終於決定結束愛情長跑，年尾準備偕女友往外國結婚。家輝結婚前決定搬離已住了三年的西貢寓所，另覓新愛巢，身在外地的關詠荷突然收到家輝的求婚電話，當然是甜在心頭。
坐在銀線灣桃源軒的家輝談起年底的婚事時，可能是人逢喜事精神爽，故心情樂透說：「早幾日我打畀佢（關詠荷），話我哋年尾去外地註冊結婚囉，佢話收到啦！婚事啲嘢等佢返嚟香港先傾啦！雖然佢表現到好似好平淡，但我聽得出佢係好開心嘅。婚禮我想去比較遠嘅地方搞，最好喺美國或歐洲，原則上會請埋雙方家長觀禮，我希望一切可以搞得低調啲，之後我哋兩個會繼續去其他地方度蜜月，其實我唔係咁鍾意去旅行，但佢鍾意，我會就吓佢。」
拍拖十二年，家輝與關詠荷鮮有與其他人傳緋聞，好幾年前雙方已認定對方為終生伴侶。縱使關詠荷有半年時間要在內地拍劇，但兩人感情從未褪色，家輝滿有信心說：「呢行雖然有好多引誘，但我個心只係向住佢一個人，佢亦都係一樣，我對佢百分百信任，佢對我亦係百分百信任，就算呢兩年聚少離多，每日我哋都會通電話。
「其實我個人好悶，幾住家男人，唔係一個好識應酬嘅人，對我認識唔深嘅人重會以為我好世界仔，擅於交際，但實情係相反，平時唔開工，我鍾意去游水、行山、健吓身，再唔係就約吓朋友食飯，有時朋友都話我係悶蛋，係得關詠荷夾到我。」
家輝續說：「唔知係咪因為我喺單親家庭長大，所以我對愛情會特別專一，好珍惜同關詠荷呢十二年嘅感情。我哋啱啱拍拖嗰陣，真係火星撞地球，因為兩個都係火爆之人，所以好容易一言不合就嗌交，有時重嗌到會反枱，點知佢又有樣學樣，又跟埋我啲臭脾氣，學埋反枱呢一招，後來大家摸熟對方脾性，互相讓步就少嘈！」