噚日76人存亡之戰，我求大俠專登晨早起身幫艾華遜打氣；點知見到佢打足全場，入咗成三十八分和九次助攻，最後都要失望而回，真係心傷。尤其是見到嗰個所謂「白人希望」雲漢成場得嗰二分，真係渣到冇人有；到咗加時連史奴都犯滿離場之後，艾華遜正式係四面楚歌。
睇波嘅時候，我都好認同評述員話艾華遜再係咁打落去，好快就玩完呢樣嘢。畢竟佢嘅打法好倚賴天賦，今季喺左傷右傷之下，入楔嘅速度已經有下降迹象；假如76人再唔搵啲幫得手嘅人番嚟幫輕下艾華遜，而要佢場場都攞四、五十分先贏到波嘅話，真係油盡燈枯都唔奇㗎，咁就真係可惜喇！
湖人前鋒荷利喺今年季後賽表現差勁，射咗三十八個三分球，竟入得兩球，對馬刺六場，射十八個三分球重全「炒」，湖人四連霸夢碎佢肯定責無旁貸。噚日美國報章已爆料，話今年約滿嘅荷利，成為第一個被開刀。另外，沙馬基獲加同老鬼梳爾都騰騰震咁話喎。
曼聯行政總監簡安日前公開來季組軍方針，會方會繼續畀錢費格遜擴軍，但又同球迷講陣容唔會大變，重話𠵱家市道麻麻，相信宿敵阿仙奴同埋啲意大利球會唔慌多錢擴軍咁話，佢哋算闊佬嘞。連財雄勢大嘅曼聯都咁樣，大家唔好期望今夏轉會市場會熱鬧。
前球王馬拉當拿正響意大利度假，意大利記者擁至，當有人叫佢預測歐冠盃戰果嘅時候，佢就貼AC米蘭可以贏冠軍，但就唔肯講理由。我諗唔使我提，讀友都應該知但凡咩球王或者足球名宿貼波，命中率都唔慌高，AC米蘭球迷聽完佢講有無打冷震呢？
曾執教葉士域治嘅佐治貝利係搶手貨，佢之前推咗唔少球會好意，惟獨睇中維拉個領隊空缺，公開送秋波。
又係嘅，其實維拉人腳唔曳，逐個秤無理由衰到要排英超聯第十六。以佐治貝利曾帶領葉士域治躋身英超聯前五位嘅能耐，只要同維拉嘅老細艾利斯搞好關係，真係有得發圍㗎。
史浩克04易帥消息甚囂塵上，據講佢哋已正式接觸前利華古遜教練達姆。不過，史浩克04好擔心達姆重未戒除毒癮、會唔會純粹借球會嚟翻身，將來過橋抽板咁。達姆錯就錯過、衰又衰咗，唔好怪人戴有色眼鏡睇佢，怨就怨自己好嘞。