日本人鍾意制服嘅程度，真係堪稱全球第一。由市川由衣、小倉優子、森本沙也加同小野愛等主演嘅cyber超時空女警電視劇《時空警察Wecker-D02》，雖然已經播完成年，六個女隊員亦都話明唔會再走埋一齊，但係一班忠實fans，至今仍然接受唔到呢六個嚟自二一○○年嘅美少女，已經返咗去未來世界嘅「事實」。
重有咁多fans支持，簡直係賺錢嘅黃金機會，話過唔再做嘅市川等美少女，冇理由唔肯走返出嚟拍番本寫真集。我羅拉發覺呢本同劇名一樣嘅寫真集，重好睇過套劇本身，因為除咗有每集嘅拍攝花絮同蝦碌鏡頭外，重有每個時空警察少女擁有嘅獨門未來武器嘅介紹，例如可以即時檢查DNA遺傳因子嘅chrono-gun手槍，同埋可以將任何物質同次元切開嘅chrono-saver長劍。
又如果閣下冇睇過呢套劇，本寫真集都啱睇㗎，因為六個美少女都會着上制服、校服同埋性感內衣同大家見面，當係六個少女嘅集體寫真集都唔錯。