上個星期港股一度被挾上9200點，不過每日平均成交70億唔夠，市面上仍瀰漫住沙士陰影，加埋經濟不景，要散戶入市其實都幾困難。
年初曾經憧憬國內白色家電巨無霸入主嘅海爾中建（1169），市場傳聞會繼續有消息跟進，上個禮拜股價仍然企得好硬淨，但若果冇新消息公布，都好難有新突破。不過，上個禮拜卻有件怪事發生，有好幾個行家喺星期五下晝走嚟搵伏勝，問有冇客有興趣沽50球海爾中建，話有買盤想要晒全部貨。不過奇怪嘅就係個買家只肯畀兩毫七，比起上個星期五早市收市價重低一格，同一般向街收貨要畀高幾個價嘅情況好唔同。
雖然單嘢最後唔知成唔成，不過依伏勝嘅睇法，隻股嘅走勢唔係好強，要收貨應該唔係太難，而畀嘅價錢低過市價，好明顯係無乜誠意。可能係有人特登放風出嚟，想打聽吓個市究竟有幾多貨要沽。
另外，同系嘅中建科技（261）同中建電訊（138）喺上個星期一朝早向上衝咗一輪之後，即刻俾人叫停咗。根據公布，話佢哋有一單關連交易進行緊，由於涉及價格敏感嘅資料，所以即刻叫停隻股。
有個行家就話，中建科技呢隻股仔今次可能有機會翻生，皆因麥老闆隻孖一六九已經肯定會由海爾話晒事，而隻中建電訊已經玩到殘晒，要靠佢做場好戲似乎幾難，唯一重有機會嘅只剩番隻中建科技。話唔定麥老闆一時興起，將中建電訊嘅資產唧晒入去隻261度，實行玩換殼大行動都唔定。不過，由於之前已經有唔少人玩呢系嘢中過招，今次唔知佢重可唔可以重施故技呢？
伏勝