K世代城城勁歌熱舞
馮仁昭四圍超：Juno阿樂做評判淨係識笑

余文樂、鄧健泓、麥浚龍（Juno）同Cookies嘅Miki及Kary，噚日去咗尖沙嘴Neway卡拉OK齊齊做評判，因為新城搞咗個「雀躍K世代歌唱大賽」，吸引咗唔少青少年參加，其中有啲參賽者重好鬼大膽同惹笑，搞到呢班評判有時都掛住笑而唔記得畀分。

透視裝跳蛇舞
噚日有位女參賽者着住黑色透視裝大跳蛇舞，阿樂同Juno睇到之後即時你推我、我推你咁叫大家忍住唔好笑，另外有位男參賽者除咗唱郭富城嘅歌之外，重即場勁舞一番，於是有人提議不如叫Juno同佢一齊跳，Juno梗係冇出去啦，但佢哋都畀咗唔少掌聲呢個男仔，事後阿樂都話：「個男仔跳舞真係好勁。」
另外，近排有傳蕭正楠因為Juno而罷上《勁歌金曲》，Juno噚日話：「我都係跟期表做嘢，其他嘢我唔清楚，我諗唔會啩，成日都有啲咁嘅新聞啦！」至於話有人搵Juno做舞台劇，重係做楊過，Juno話：「其實𠵱家都未定，我做邊個角色都冇所謂。」

關心妍已經有個仔
關心妍噚日去咗荃灣愉景新城出席「安心保寶寶競技賽」，佢話自己好鍾意細路仔。
關心妍話：「我𠵱家都有喺非洲助養咗一個男仔，媽咪就助養咗兩個女仔，我都想喺香港申請助養細路。我計劃三十三歲結婚，將來要生四個仔女，我頭一胎希望可以生個女。」

楊超成有意收購永祥業權
有報道話東華三院將以一億零六百萬元收購永祥大厦嘅業權，噚日東華主席楊超成出席大圍一個乒乓球賽時話：「大家傾過吓啫，𠵱家重係商討階段，東華要買任何物業都要先作評估，然後開董事會，我哋對好多物業都有興趣㗎。」問佢數字係咪真係億幾？楊超成就話：「唔好意思，唔講得。」

嘟嘟新加坡唔怕歧視
鄭裕玲（嘟嘟）噚日出發到新加坡，準備拍攝英語劇《Oh！Carol2》，佢話呢次要喺嗰邊逗留兩個月，問嘟嘟男友呂方會唔會過去探班，佢話：「呂方呢排忙錄音，不過佢叫我上機一定要戴口罩，我都唔擔心去到新加坡會俾人歧視。」

羅嘉良畢架山睇樓
羅嘉良早排婚姻亮紅燈，好彩最後都同老婆和好如初，重簽埋寰宇做經理人公司，賺咗一大筆。事業家庭都如意嘅嘉良，噚日去咗畢架山睇樓，佢睇咗間一千四百呎、約值七百萬嘅豪宅，據講嘉良貪畢架山嘅學校網好，佢個仔都差不多係時候要開始返學，所以要為將來嘅教育鋪路。