立法會議員同政府高官嘅鬥法，噚日由室內鬥到室外，佢哋齊集小西灣運動場嚟一場生死之戰，曾蔭權、王永平、馬時亨、立法會主席范徐麗泰等捧場打氣，十三個議員同十九個高官分別着上藍、紅波衫輪流上陣，起踭、飛鏟、爭頂頭槌……估唔到大家平日西裝骨骨，一上球場會咁狼。
高官隊原來已經連續輸咗九年，噚日王永平一到就講笑，話公務員有條規例，做事唔可以令公務員蒙羞，如果高官隊踢得太難睇，要紀律處分。
平叔嘅威脅果然有效，上半場入替林瑞麟嘅經濟發展及勞工局副秘書長范偉明率先建功，令高官隊領先一球。議員隊嘅鄭家富射失十二碼，煲呔曾就特登走去潤阿富：「我哋贏，全靠你！」阿富更因全場錯失三次「餐士」，俾隊友叫做「敗家富」，懷疑佢係「無間道」卧底，要求成立獨立調查小組查吓呢位「立會劉（德）華」。其實高官隊好波之人不少，好似警務處行動處處長鄧竟成同行政署助理署長麥敬年等。
好在最後「大嚿」陳偉業入番一球扳平，重同特首答問大會上俾佢稱為「宦官公公」嘅林瑞麟搭住膊頭鬥嘴，你叫我「錦衣衞」，我叫番你「東方不敗」。
傳真︰2623-9278
電郵︰
