張家輝最近可謂人逢喜事精神爽，他回巢拍攝無綫劇集《十萬噸情緣》，首周收視成績相當理想，加上晚間重播《天地豪情》，令家輝人氣立即飆升。他年尾又將與關詠荷拉埋天窗，並會盡快生BB，組織美滿家庭。
張家輝和張可頤主演的無綫劇集《十萬噸情緣》首周平均收視已經有三十二點（約二百零七萬觀眾收看），反應相當不俗，再加上晚間重播的《天地豪情》，令家輝的人氣明顯飆升。
家輝從小的志願是希望做一個真正的男子漢，所以他年輕時加入警隊，在警界服務了四年，後來因向上司申請轉做CＩD不果，一怒之下，他就離開警界，轉投娛樂圈發展。
家輝說：「以前我好衝動同火爆，決定要做嘅事，冇乜人可以改變我，不過𠵱家個人年紀大咗就唔會咁樣，記得初入行嗰陣，我喺無綫發展麻麻，就轉咗去亞視發展，點知都冇乜起色，嗰陣壓力好大，重試過神經衰弱，後尾又轉返去無綫做，發展即刻唔同晒，識我嘅人真係多咗好多。」
兩年前家輝在無綫月入約兩萬元，一年約賺二十四萬元，當年無綫與他談續約，他因為要求公司加薪不果，最後決定離開公司往外闖，結果這兩年來有人認為家輝沉寂了，但他這兩年的總收入卻比在無綫時多出近二十倍，所以他沒有後悔當年離開無綫的決定。
如今無綫的首席小生羅嘉良亦決定離巢，改投寰宇電影公司，過來人張家輝又有甚麼看法呢？他說：「嘉良今次嘅決定，好難話係咪明智，不過𠵱家電影市道唔係咁興旺，競爭又大，嘉良呢個時候出嚟可能會辛苦啲。兩年前我決定離開無綫，除咗想搵多啲錢外，最主要係希望試吓喺電影圈同歌壇發展。呢兩年我只係拍咗兩部電影同兩套劇，間中又走埠登台同拍廣告，收入真係多過喺無綫嗰陣好多，不過喺無綫拍劇，人氣會好好多，所以我都幫無綫拍《十萬噸情緣》。」
雖然家輝不想被定型為喜劇演員，但看過《十》劇的觀眾還是喜歡演喜劇時表現可愛的家輝，而晚間重播的《天地豪情》，家輝演的奸角卻人見人憎，他對此說：「無綫係好有影響力，如果要保持人氣，遇到啱嘅劇本，一年回巢拍一套劇都冇壞呀！不過我同英皇滿咗經理人同唱片約之後，𠵱家轉投寰亞，希望可以有一個新發展。」
撰文：陳月媚攝影：仇志德、仇志中
