民主派陳偉業在立法會提出倒董動議，失敗係意料中事，根據現有嘅立法會投票點票機制，民主派輸梗，陳偉業動議，為議員高官提供機會做棟篤笑而已。
博士Y最近頻頻與商界要人會面，商討一啲大型項目，佢哋當然坐埋就少不免講吓董生笑話，長講長有。博士Y得到嘅印象就係，倒董之事只可做，不可說，更不可由民主派做。如果民主派真心真意要倒董，就要同商界合作，閉口幾個月，唔好刺激中央。
博士Y話：「你知道中國風情嘅啦，你話倒董，中央就OK，咁咪好冇面？點解要俾民主派攞分？商界都唔知有幾多小報告上咗北京。困難係政客要做騷，公公要護主，一人一句，中央就覺得唔穩定，驚住惹出麻煩，多一事不如少一事，以後再算，咁就益晒特首啦！」
博士Y反映嘅，唔係私人意見，而係佢經常碰頭嘅商界人物意見。呢班人全部收入高，教育程度高，就係鍾庭耀篇文章提到嘅「反董中堅」。據鍾庭耀講，民意調查發現，比較滿意董特首嘅市民，多數係教育程度低，收入比較少而且年紀大嘅人，其中又以女性為主。即係話，就係比較需要綜援、福利津貼嘅一批人。睇完篇文，左丁山覺得奇怪，特區政府點解要削綜援，減福利開支，與特首支持者作對呢？