美國創作女歌手Jewel下星期五二十九歲生日，佢推出首張大碟至今已經八年有多，一直以嚟大家都見慣Jewel喺台上面揸住結他自彈自唱個款，不過我羅拉發覺佢近期嘅形象完全唔同晒，變得鬼咁性感！
過去走健康性感路線嘅Jewel，呢次可算去得盡囉，首先佢下個月推出嘅大碟《0304》比以往嘅作品pop得多，另外Jewel喺第一首主打歌《Intuition》MV入面嘅形象亦係前所未有咁性感，bratop、谷胸兼濕身瓣瓣齊，認真益街坊。
《Intuition》MV由MarcKlasfeld操刀，呢個鬼才曾經幫過Eminem拍MV，而今次構思都幾得意，Jewel喺MV入面周街行發白日夢，一見到人打籃球，竟然聯想到用自己個名做運動用品品牌，兼且重賣埋牛仔褲同啤酒廣告，相當抵死！其後Jewel又扮到成個彭美拉安德遜（PamelaAnderson）咁四處惹火，要勞煩消防員向佢射水！
今次改變形象嘅Jewel話，唔驚冇咗以前啲fans，反而覺得自己唔多慣：「MV入面嘅嘢，我以前諗都未諗過會做，又俾消防喉噴，又要跳Britney同Christina啲舞，真係搞鬼！」