雖然個市唔算脫離沙士打擊而轉勢，但好明顯多咗二三線股炒作。膽生毛嘅經紀陳，就同小初品題一隻近日股價勁升嘅泓鋒國際（2309）。
泓鋒自去年上市以來，成交異常疏落，雖然久唔久都見到有人出嚟Mark價，但始終唔成氣候，但近幾日突見異動，噚日更大升14.73%，收1.48元。
經紀陳話，隻股上市之初，認真生不逢時，個市靜到蚊飛過都聽到，批畀公眾嘅街貨，查實頗為集中。據聞有人唔甘心就此算數，所以一直都在靜待機會，如果心水清嘅話，可以發現隻股起步之日，正係啱啱上市夠6個月，大股東可以合法買賣，家陣做定氣氛，並唔出奇。隻股先前公布截至上年9月底止業績，錄得純利1300萬元，升30%，估計稍後全年業績表現唔會差，有炒作藉口。
小初基本上唔多敢駁嘴，但泓鋒業務異常冷門，係為成衣製造商提供市場推廣，同埋企業社會責任監察服務，其實聽完都唔多明，加上隻股升得急，風險唔細，高追要小心。
慕容小初