魚缸持續沉悶，成交得65.87億元，恒指窄幅牛皮，收報9093，跌32點。噚日魚缸中人茶餘飯後話題，除咗圍繞在阿董發火之外，亦好關注新界東聯網醫院內部指引，唔畀部份醫護用N95口罩。唔通港府可以用118億元刺激經濟，但就畀唔起每日14萬元口罩支出？若果每日14萬元可以買到醫護人員嘅士氣，其實亦抵到爛。國泰（293）都可以每日蝕2340萬元，唔通坐擁3000億元財政儲備的香港政府，畀唔起14萬元口罩錢，好心用錢唔好用得咁膚淺啦。
力寶系傳出短期會進行重組，力寶（226）股價一度升超過30%，收市時升幅收窄至21%，收0.92元，但係成交只得91.6萬元，冇乜啟示性。旗下力寶華潤（156）則腳軟，跌5%，收0.113元，成交1624萬元，沽壓唔細；香港華人（655）升幅放緩，僅升1.2%，收0.86元，成交2134萬元。黑客話，若然只係系內重組，根本上冇乜刺激性可言，如果有心搞私有化，通常大股東唔會在市場大手增持，將股價推高咁儍，總之跟炒就小心。
福田實業（420）業績奇佳，中期盈利增長90%至2億元，兼且派息好，刺激股價勁升11%，收6.55元。市場即刻憧憬成衣股可能好好景，佐丹奴（709）、德永佳（321）、長江製衣（294）、同德仕（518）與黛麗斯（333）升4－10%，其中黛麗斯成交更超過1億元，市場主要憧憬今年有息派。
Cookie話，據聞有基金玩厭咗私有化尋寶遊戲，轉而追捧有實力工業股。唔通私有化概念股就快玩完？香港興業（480）在1.50元以上水平好似已行人止步；大昌（088）近日亦只在1.30元附近徘徊，毫無突破迹象，最慘係成交開始有萎縮現象。
阿虎