香港魚缸成交似乎又轉弱，成交只得67.7億元，恒指收報9126，升22點。ｅ莉莎話，呢個同阿董效應有關。前日，立法會辯論叫阿董辭職，但阿董無出席，反而選在噚日上立法會，就SARS進行答問大會，好多股民見大市缺乏方向，轉去睇電視直播阿董點樣被人鬧。
不過，相比起三司十局聯同保皇黨前日激戰在野黨一役，噚日「場戲」就膚淺得多，一啲都唔精采。ｅ莉沙一向都專注股市而少理政治，但唔知點解自從阿董上台後，對政治興趣日濃，阿董你都算好嘢。
多倫多連疫區之名都除埋，但世衞遲遲未撤香港旅遊警告，加上國泰（293）對證券界話，以樂觀估計，疫情仍會影響其業務數年，導致國泰再遭拋售，跌4.8%，收報8.95元，成交達3.04億元。其實明眼人都知，除非SARS有特效藥，否則即使香港旅遊警告已除，外國旅客至少要一兩年才能淡忘SARS的恐懼，而長線基金亦未必有耐性等國泰復甦。
東方海外（316）俾花旗美邦唱好話要見10元，刺激股價繼續創新高，噚日收報8.65元，再升8%，成交838萬元，似乎真係要向10元進發咁款。
泰興光學（389）終於成功以每股3.50元配售4000萬股，集資1.4億元，泰興其實想配股好耐，點知上個禮拜俾裕元（551）、思捷（330）同中石化（386）行先一步，打窒此股的抽水計劃，需要稍為押後等待良機，不過大市走勢有下滑迹象，配售代理醒水，實行快刀斬亂麻。配完股之後，唔少大行開始出貨，股價跌4%，收報3.50元，成交1.52億元。
阿虎