呢個星期六日，大家可以去銅鑼灣時代廣場趁吓熱鬧，因為駐港韓國商會喺嗰度發起一個義賣泡菜同人參嘅「WeLoveHongKong」活動，善款會捐畀前線抗炎醫護人員。
商會會長李勉官對八方話，雖然冇科學證明食泡菜同人參可以對抗非典型肺炎，但係韓國到目前為止真係冇乜人感染SARS，香港嘅七千韓國僑民亦完全冇人中招。佢話今次義賣係希望幫港人打打氣，所以既請高官如唐英年出席開幕禮，又請埋二十六個駐港外國商會代表齊齊參加，各人以自己嘅語言講唔超過一分鐘嘅愛港宣言，真係好有諗頭。
為免場面太悶，呢個活動重有歌星陳慧琳、藝員陳啟泰同香港小姐助陣。八方問李生點解對香港咁投入，重快手過阿松，佢大條道理話韓國同中港為鄰，點可以坐視不理呢？
另外，媽打李麗娟噚日好開心咁向記者滙報，護幼教育基金已經累積到三千七百幾萬，但需要幫助嘅小孤兒已經達到六十幾人。
聽日媽打會再去淘大探望兩家人，上次佢提到鍾意利物浦球星奧雲嘅小男孩，馬會送來奧雲海報畀佢，原來重有下文，馬會聯絡緊利物浦球隊，向對方要求一件有奧雲同其他球星簽名嘅波衫，如果成事，亦會送畀呢位小朋友。
傳真︰2623-9278
電郵︰
