大市在高位爭持，連續3日整固，恒指上落在三數十點之間，市場承接力遠比預期為強。今次反彈，恒指由4月25日的低位8331點起步，到本周三的9217點，共上升886點，且已逼近3月高位的9282阻力位水平，理論上係會出現一次小幅度的調整，而目前市場主流意見亦係如此，但大市跌唔落，顯然貨源係集中在大戶同基金手中，散戶基本上除歷史遺留下來的長線投資外，呢一輪冇點買貨，主動權既在大戶手上，唔排除佢哋會再挾多一轉，先畀個市調整。
目前50日線在8950水平，若大市調整今次升幅的0.382，則支持位在8878點；若調整0.5，支持位在8774點。大市調整，回落到8800點水平，守得住再上，且升破3月高位9282點，則確認見底，中期升浪再起，初步目標指向去年12月初高位10247點。
SARS在香港受控，內地疫情亦有高峯回落迹象，倘趨勢持續，相信本月底情況會有進一步改善。SARS打擊經濟，影響深遠，香港呢兩個月，無論旅遊業、飲食業、零售業同娛樂事業，全部叫苦連天，人人匿喺屋企避炎，市面一片靜寂，但疫情受控後，市民又恢復上街，銅鑼灣同旺角又見番人海，舖頭生意亦好轉。
過去一個月來，內地政府為防止疫情大規模蔓延的措施，做得好徹底，除採取區域性隔離外，多個省市更停辦旅行團，令旅遊業受到極大打擊。不過，只要疫情受控，雖然未必會斷尾，但只要全民在加強防範的大前提下，生活逐步回復正常，則遭長時間壓制的旅遊需求湧現，旅業將會迅速復甦。
有危才有機，最惡劣環境之時，通常亦係入市的最好機會。早輪先講過，話有基金在密密收集兩隻重災股──中旅香港（308）同南方航空（1055），噚日又收到料，加多一件，就係首都機場（694）。呢個月來，上述3隻股票嘅走勢都好硬朗，筆者則對於中旅更具好感。
上月底中旅反彈，到1.08元後整固，已有多日，暫時受制50日線（1.1元）阻力，若破位而上，目標將指向1.35元。中旅有一隻認股證，下月30日到期，行使價1.22元，若全部認股，可為公司帶來現金9.2億元，相信中旅不會放過集資的大好機會吧。
郭兆誠