前一排玩完七彩機殼嘅PS2，到今個月又推出SCPH-50000新型號主機，加入咗對應DVD-R、DVD+R同播放DVD對應逐行掃描，前排坊間有傳到好似勁過晒啲行貨咁，今次表面上係加咗功能，不過睇真新型號取消咗i.LINK插口，亦即變相宣布今後遊戲唔再會有i.LINK對戰系統，日後想玩《GT3》i.Link對戰就唔使諗，所加嘅強化DVD播放功能更加唔切合需要，𠵱家香港一部對應逐行掃描嘅全區碼DVD機都係一千蚊樓下有交易，日本版PS2只可以播放日本區碼2嘅DVD碟，實用性真係成疑，講咗咁多，想買機而聰明嘅你又點會唔識揀！
上次提過隻《ENTERTHEMATRIX》會跟套電影一齊推出，鐵人收到料XBOX今個月26號左右就會推出行貨，附有中/英雙語選擇，今次三部主機都有行貨，不過大家要留意，除咗XBOX可以用行機玩之外，PS2同GAMECUBE嘅行貨都係美版，語言用英文，但係一般用家無論部機係水貨定行貨，多數都係亞洲區，即係玩唔到美版遊戲（改咗機另作別論），而亞洲版遊戲當然要跟日本套《THEMATRIX2》嘅上映時間，即係6月中打後，想買呢個Game嘅人要留意。XBOX6月《MIDTOWNMADNESS3》同《BruteForce》亦會有行貨推出，至於今年Disney大作《FINDINGNEMO》除咗電影會喺暑假上映外，XBOX版遊戲亦會有行貨推出。
PS2今個星期推出由大熱動漫畫改編的遊戲《Chobits》，由於無行貨加上日本貨源都緊張關係，坊間相信賣到$450-$480都唔奇，有追開漫畫嘅不妨睇睇；上星期缺貨嘅PS遊戲《ONEPIECE》亦返咗小量貨，市價約$350-$380左右；6月5日推出嘅SEGA《育成足球3》日本方面傳來消息，應該亦唔會有太多貨，有興趣不妨預訂。
GBASP依然係本周主角，主機價依然係$830-$850左右，SP主機配件亦愈出愈多，除咗本地產品外，好似日本「KEY」公司推出嘅型仔主機叉電底座亦好多舖頭有得賣，市價約售$140-$150左右，GAMECUBE機價則約$1,100左右，大部份GC日本版遊戲售價亦隨5月淡季下跌，好似《Zelda》、《VirtuaStriker》等大作都係200蚊有找，真係買嚟儲都抵。
文：打機鐵人