新地元朗大型住宅盤YOHOTown，雖然話七月先賣，但近排已經不斷催谷。
為咗令買家留下深刻印象，發展商諗到為樓盤出一本雜誌，可算係香港嘅創舉。
呢本雜誌叫《YOHO雜誌》，新地周國賢話係一本品味生活雜誌，針對一班重視生活、關懷家庭、熱愛朋友同對生活有要求嘅年輕人而設。內容會介紹世界各地及城市「YOHO人」嘅生活感受同夢想，因為想要有YOHO嘅快樂生活，就要有國際視野，所以雜誌嘅編採組，專登走訪紐約、倫敦、東京同上海四大城市，訪問幾十個不同國籍、種族同階層嘅人，講吓佢哋各具特色嘅YOHO生活。
本港上個月受SARS打擊，樓市異常慘淡，有代理行透過減薪減少支出，員工梗有不滿啦。蘭西收到一封署名「一群被壓迫的地產agent」信件，指中原某區話事人，迫下屬離職，重要佢哋簽自願離職書同自願畀公司扣三成佣金，但其他區就可以喺董事同意下唔使扣三成佣。
蘭西向中記查問，聯席董事鄧意民（圖二）話，對於扣佣嘅指控，佢以香港地產代理專業協會會長嘅身份回應，話若果係做一手代理，發展商會準時畀佣，代理行應該唔使做啲乜嘢追佣行動，代理離職要扣佣就唔合理；若二手交易，買賣雙方都唔使追佣嘅，都應該唔使扣佣；假如要公司跟進同搞一大輪先收到佣嘅，扣起啲都好應該，係咪三成就可商榷。佢又話，若經紀遇到唔公平對待，可以向小額錢債審裁處尋求協助。
為要推動市民積極消費，太古地產鰂魚涌太古城中心又搞推廣，由今日起到六月三號，只要喺商場內累積兩張金額四百蚊或以上嘅發票（由兩間商戶發出），可以換到一百五十蚊現金券，喺商場內食晚飯時用。重有就係兩張戲院贈券、冰上皇宮買一送一入場券一張同埋三個鐘免費泊車優惠。全部優惠都係喺商場內享用。
近日雖然多咗市民出街消費，但零售商戶嘅生意額都未回復SARS前水平，大業主搞多啲活動吸引消費者，對各方都有好處。
恒基地產又催谷港灣豪庭，自然要搵代理幫手。恒基今次搞短途賽同全程賽。所有代理分成三隊，中原夾利嘉閣，美聯夾港置，其餘係港聯、祥益地產、世紀21同埋金豐易居組成一隊。短途賽係即日起兩個禮拜內，邊隊做得最多單數，恒基請去中環陸羽茶室食餐勁嘅。
全程賽係即日到下個月九號，最多成交嘅代理可以免費上香港小輪嘅洋紫荊號玩一日，去睇興建中嘅迪士尼樂園同參觀大嶼山，舒展身心。
蘭西
電郵地址：
