經紀黃真係好嘢，日前話芬佬愛股福田實業（420）中期業績會有驚喜，噚日果然公布盈利1.99億元，比舊年同期勁升89.5%，兼派中期息12仙。
福田升3.5%，收5.90元，股價接近1年高位。芬佬早排無懼沙士風暴敢於增持，真係有一定道理。經紀黃話，由於業績靚，估計今明兩日福田股價會繼續有表現。
另外，講起工業股，經紀黃又提起至卓國際（2323），隻股先前由於業績唔對路，芬佬決定離場，股價一度被質落至0.625元，但奇怪係有人密密接貨，終於知道建滔化工（148）變成主要股東。
經紀黃話，建滔似乎對行家特別有興趣，之前密密買入依利安達（033）已經係一個好例子，建滔沾手嘅股份，次次都有收購整合藉口可炒，股價亦有表現。基於呢個理由，經紀黃覺得至卓有得諗，隻股噚日升4.55%，收0.69元，可以繼續留意。
慕容小初