第五十六屆康城影展啱啱開咗幕，今屆除咗有嚟自世界各地嘅電影參展之外，值得注意嘅係日本卡通大舉入侵康城，我大口羅拉身為日本卡通迷，當然覺得好興奮啦！
之前日本嗰邊已經大事報道，話宮崎駿徒弟高坂希太郎執導嘅賽單車勵志卡通《茄子》，會成為首部日本卡通片喺今屆康城上映。
不過，我羅拉就比較關注《千年女王》同《銀河鐵道999》原作者、世界知名嘅日本漫畫大師松本零士齣新作，佢傾盡全力製作嘅科幻卡通新作《INTERSTELLAR555》稍後亦都會喺康城播放。
其實松本零士當初係應國際知名法國二人電子組合DaftPunk嘅邀請，為佢哋嘅唱片拍幾個有故事連續性嘅卡通MV，但松本零士就一啲都冇嘥，將十四分鐘嘅短片搞成一套六十分鐘長嘅卡通電影，重率先喺康城放映，益吓啲海外fans。
我羅拉早排都睇過DaftPunk嘅MV，雖然係全新嘅故事，講四個band友化身太空戰士維護宇宙同打外星人，但角色嘅造型熟口熟面，令人好緬懷松本嘅經典卡通。