近排GAMECUBE走勢緩慢，已有被XBOX追過之勢，令到好多大廠都轉移陣地，如CAPCOM嘅《BioHazard》新作已經非GC獨佔，其他如世嘉、SQUAREENIX等亦未出盡全力相助。儘管如此，任天堂憑住獨特之做Game觸角，以及多款賣座勁作，唱獨腳戲仍游刃有餘。
任天堂可以唔理東京遊戲展，不過每年必定喺E3EXPO度有大搞作，最為人樂道係其展館設計，全場最大之餘重要夠靚，今年更以拉幕為主要設計，配以大量遊戲角色及產品之投射影像，中間舞台重有樂隊彈奏電子樂器，身處其中簡直如入夢幻樂園，呢啲就係任記一貫嘅成功特色嘞。
今年任天堂差不多一口氣展示十款招牌新Game，其中大部份為自家出品，當中又以瑪利奧出場最多，幾款新Game都有佢份，繼續擔當搶客之大任。
一直受玩家歡迎之另類賽車遊戲，鬥快之餘重要出盡法寶阻止對手爬頭，掟石、放炸彈等茅招盡出。展館內一共擺放八部機座，供兩隊人作即場連線對戰。新一集喺GAMECUBE上表現出色，用色豐富兼角色動作生鬼，重新加入副手幫拖，一個睇住賽道往前衝，另一個就專責攻擊對手。人物新增至16名，各有不同戰車及特性，玩家可自由配搭最佳之出擊陣形。
瑪利奧又搞Party，雖然新一集玩法變化唔大，仍是以一大堆迷你遊戲較技，不過勝在夠晒簡單。會場內試玩版一共提供七個迷你遊戲，每款都設計得好有心思，如避開大堆企鵝鬥遲跌落水、鬥快向下鑽石到地底、以及類似「123紅綠燈」等玩法，全部簡單得嚟亦需時間掌握技巧，大人細路都咁啱玩，實屬一班人開Party搞氣氛嘅上上之選。
自從91年喺超級任天堂登場後，口碑一致讚好。新作《F-ZeroGX》為任天堂跟世嘉攜手合作之產品，憑住任天堂獨到之遊戲性，再加世嘉之製作技術，喺會場上大放異彩。場內除有四台試玩機座外，重額外設有一座對應體感嘅機座，隨住左轉右掟，座椅亦會搖擺不定，咁真實嘅打機感受，再配埋出色畫面，難怪呢部體感型《F-ZeroGX》有最多Fans排長龍等玩。
任天堂另一重點產品，就係喺日本推出不久嘅GBASP，場內一口氣擺放十幾部唔同顏色嘅GBASP，色彩繽紛非常搶眼。而講咗一段時間嘅多媒體周邊，亦有Sample機展示出嚟，據開發商AM3Inc表示，其中一款採用SmartMedia記憶卡嘅影像系統，透過獨特影像壓縮技術，能播放24分鐘全屏幕高質素動畫（以32MB計）。
《FF》系列重投任天堂懷抱，第一炮《FFCrystalChronicles》在GAMECUBE上登場，除一貫RPG元素外，亦可如《薩爾達傳說：風之指揮棒》般接駁GBA，幫忙找尋寶物等道具。
《BioHazard4》冇嘢睇，反而CAPCOM隻《ViewfulJoe》就有得試玩。遊戲以卡通貼圖夾3D表達戰鬥場面，角色出招酷似特攝超人般，重有加速攻擊，都算幾好玩。
潮流興食兩家茶禮，連Solid都要喺GC亮相。呢隻《MGS:TheTwinsSnakes》屬舊版《MGS》移植版，不過畫面重新製作兼加入「VRMission」。