上星期日本欄講加大柏克萊點解唔收中台港學生讀暑期班，點知當日就有新聞話柏克萊改變主意，只係唔收五月二十七日開學，六月及七月份開課嘅四個暑期班不受限制。
本來呢啲新聞好平常，柏克萊改變初衷，講唔定就係各方有力人士游說嘅結果。柏克萊有好多亞裔學生，要照顧各方利益，希望能做到面面俱圓。講到尾，凡事皆可政治化，教育亦唔例外。
但有樣唔係咁平常嘅就係上星期六（五月十日），香港大學發出新聞稿，指港大副校長史秉斯（Spinks）啱啱由加州返嚟，喺加州見過柏克萊校長RobertBerdahl，傾過上述暑期班之事，柏克萊喺五月十日（美國時間）會有公佈。當時左丁山睇完份新聞稿，第一個印象就係，副校長出外訪問，見過唔少人，點解要求特別發表一份新聞稿？唔通有料到，史秉斯說服柏克萊解禁？
哈，五月十一日嘅報紙，竟然係引述中大校長金耀基嘅說話，講明Berdahl喺五月十日主動致電金耀基，解釋為何先禁制，後解禁之事。原來港大中大最近互相競爭，估唔到為咗柏克萊，亦要爭住向傳媒放料，港大話副校長主動見柏克萊校長，中大話柏克萊校長主動來電，總之大家都認吓威。如果睇過往歷史，當然係中大與柏克萊更有淵源，創校校長李卓敏係柏克萊教授，為兩校建立好多關係，至今不變。之不過柏克萊解禁，主要係美國民權分子施壓，與中大港大無關。