婚姻失敗使乜驚呀！
馮仁昭四圍超：薛芷倫獨居半山肥咗又靚咗

薛芷倫同大生銀行家族成員馬清偉傳婚變之後，有傳馬家喺山頂貝璐道買咗間屋送畀佢，間屋𠵱家已經裝修好，薛芷倫重搬埋入去住㖭。
前日晏晝四點幾，馮仁昭個朋友喺中環娛樂行間Salon整頭時見到薛芷倫，佢喺度染髮，搞到七點幾先走。不過，早排瘦到得棚骨嘅佢，𠵱家肥番啲，又曬到一身古銅色，睇起嚟容光煥發。

逛便利店
薛芷倫離開Salon之後，坐的士去咗銅鑼灣時代廣場，好逍遙咁行街買嘢，見佢走嘅時候攞住一袋、二袋喺超級市場買嘅食品同日用品，重去咗便利店買嘢飲，然後就搭的士返咗貝璐道永安村屋企。薛芷倫前晚九點幾返咗屋企之後一直都冇再出街，我諗佢喺新屋度都住得幾開心！

李心潔男友搞笑奪芳心
李心潔沐浴喺愛河之中，心情特別興奮，噚日佢喺台灣一個記者會度，就大讚男友彭順，重狂數男友嘅優點，夠穩重同心腸好等，一路講就一路笑，真係好鬼甜，講到同男友日久生情，佢就話：「拍電影《見鬼》好吃力，但是他就經常對我講笑，不時讚我做戲好，藉詞請我吃飯，久而久之，就萌生愛意。」

嘉碧儀睇重腳趾
林敏俐同嘉碧儀噚日喺尖沙嘴出席無綫宣傳活動，對於有報道話今屆幾位港姐衣着好「娘」，嘉碧儀就否認話：「我哋嘅衣着係切合港姐形象，至於話我啲腳趾肉酸，我唔會嬲，我不嬲都好注重自己啲腳趾。」而林敏俐亦否認自己有「印」腳嘅習慣，佢解釋當日只係着咗高踭鞋翹腳。

郭羨妮暴走瘦身
郭羨妮噚日喺沙田出席無綫《2003年度香港小姐競選》宣傳，佢話呢排放緊假，所以就得閒跑步同做纖體。對於有報道指郭羨妮推薦緋聞男友陳豪一齊拍莎莎纖體廣告，佢話：「啲報道無聊到死，搵邊個拍係廣告商決定。」

鄭則士剃頭趕「沙士」
陳煒、黎思嘉同鄭則士等，噚日喺亞視總台出席新劇《醫神》開鏡拜神，一班演員之後會出發去北京開工。陳煒噚日重同鄭則士進行剃頭儀式，鄭則士話：「如果剃頭可以趕走『沙士』都好。」陳煒話拍劇期間，佢會返嚟參加亞視台慶嘅演出。