撥開SARS愁雲尋開心
尹光扮阿樂露毛放笑彈

非典型肺炎令港人陷入一片愁雲慘霧，為紓緩一下緊張和不安的氣氛，尹光決定與朱咪咪及盧海鵬開騷搞笑，一展扮嘢身手。日前尹光向難度挑戰，竟扮余文樂和麥浚龍（Juno），大放笑彈，並為自己「鹹濕歌王」的稱號平反。

尹光將於明日和後日一連兩晚，於香港文化中心舉行「尹光開心爆笑演唱會」，屆時他除演繹《荷李活大酒店》和《數毛毛》等多首諧趣歌外，亦會扮貓王和許冠傑，務求施展渾身解數大放笑彈。

只敢露肚臍毛
自言與時代並進的尹光，日前嘗試扮新人王余文樂影露毛照、學Juno跳舞及模仿黃又南在電影《一碌蔗》的爆炸頭造型等，藉機考驗一下自己的扮嘢本能。不過，一向擅長扮嘢的尹光扮阿樂時卻只敢露肚臍毛，造型爆笑卻有點驚嚇。
尹光事後表示扮阿樂和Juno難度甚高，他說：「佢哋啲歌真係好難記，好難入腦，而且𠵱家啲新派歌手影張相都動作多多，又要露毛，又要擺隻手喺褲襠度，難度真係好高！
「相比起上嚟，我哋嗰個年代嘅歌手真係純情好多，講真句，咁多年嚟你哋有冇見過，又或者聽過我嘅歌喺電台同電視台播？我係憑實力跑出嚟。」

「我啲歌唔鹹濕」
對於「鹹濕歌王」的稱號，尹光說：「我嘅歌一直以嚟俾人話係鹹濕歌，其實我啲歌一啲都唔鹹濕，好似《數毛毛》咁，只不過係講心口毛、汗毛同頭毛之嘛，歌詞完全冇講三級嘢，正確嘅用詞應該叫做諧趣歌至啱，我真係有必要為自己平反一吓！」
採訪：戴彩煥
攝影：甄朝建
協力：羅慧敏
服裝提供：Coner
假髮提供：CarmenGiftShop