劉家良昨日出席電影宣傳活動，即大彈成功進軍荷李活的袁和平，其任武術指導的《22世紀殺人網絡》不懂真功夫，只靠特技取勝，劉家良又指張藝謀執導的《英雄》是跟風之作，將其個人的短處暴露出來。
劉家良師傅昨日往尖沙嘴出席電影《醉馬騮》的宣傳活動，他透露此戲會參加本月底的康城影展，屆時會舉行首映禮，執導此片的劉師傅笑言自己只是用了六成功力拍攝。
劉師傅說：「不過𠵱家香港都好少用咁硬橋硬馬嘅真功夫去拍，通常都靠特技。」問他有否觀看其他武術指導所製作的電影，例如袁和平的《22世紀殺人網絡》？他說：「咪來來去去都係咁囉，冇變過，如果話有變就係加特技，話有進步都係啲特技有進步；但我自己就一定唔會拍，因為唔想呃人，功夫就係功夫；好似《臥虎藏龍》嘅功夫就好簡單咁靠威吔，但都要啲演員做得好至得，如果套戲冇周潤發做就仆街，佢真係做得好好，好有魅力。」
劉師傅還大彈張藝謀執導的《英雄》，他稱此乃跟風之作，他說：「佢根本唔應該拍呢啲，佢拍小品就叻，跟風拍武俠片只係捨近圖遠，將自己短處攞出嚟，好似李連杰同甄子丹場戲就睇到我好𤷪𤺧，拍兩個人企喺度，完全拍唔到佢兩個識功夫。」
此外，劉師傅頸上掛有一個微型空氣清新機，他表示乃張栢芝送贈，他還大讚栢芝既孝順又尊重長輩。
而今次劉師傅自導自演的《醉馬騮》，戲中劉師傅飾演鏢局二當家，他在一次押鏢途中，因遇到演捕快的劉家輝偷馬，兩人一言不合打起來，過招後兩人惺惺相惜成為了好朋友。
採訪、攝影：魯萍
