今年SCE並未喺E3EXPO度透露開發PS3嘅情形，剛公布嘅手提機PSP亦未見真身，故此所有焦點理所當然地落晒喺《GT4》身上。SCE為呢隻賽車Game霸主投入重本，建立五個超大屏幕再加十多部試玩機座，而特大比賽舞台重設計到十足十遊戲節目《一筆Out銷》咁，可見SCE對呢隻Game充滿信心。
記者、攝影：徐影龍
之前有人話《GT3》已經用盡PS2機能，進步空間有限。不過到親身感受過《GT4》後，不其然令人佩服山內一典為首之製作隊伍。未玩《GT4》已經被其終極畫面吸引目光，不單車身造型更為細緻，連背景製作都毫不含糊。除面前建築物逼真外，連過往最被忽略嘅遠景，都做到真嘅一樣，最明顯係其中一條Rally跑道，遠景之峽谷像真度簡直可以實景嚟形容，唔鬥車都可當遊車河咁睇風景。今集最大特色係終於加入Online功能，毋須像以往用i.LINK連線咁麻煩，可能亦會像XBOX《PGR2》咁，提供鬼影對手畀玩家挑戰。
喺E3EXPO開幕前一日，SCE例牌地先舉行簡單嘅記者發布會，不過卻令入場人士驚訝萬分。事關SCE喺會上即場宣布開發PSPortable（流動型PS，下簡稱PSP），而且重有齊基本規格；採用自家嘅UniversalMediaDisc（UMD）作儲存媒體，光碟直徑約60mm，容量達1.8GB，比GBA卡帶式嘅256MB容量多七倍，兼且有獨門防複製技術。屏幕設有背景燈功能，解像度為498×272，極為近似SONYClie嘅闊屏幕格式，圖像晶片以0.9微米製程，具有2D及3D能力，更支援MPEG4解碼。擴充插槽暫定有USB2.0及MemoryStick及採用專用鋰電池。縱觀整體設計及軟件支援度，均是任記GBA之強敵，令人十分期待，可惜暫定要2004年尾先推出市場。
喺PS2展館內，同時展示咗一款周邊EYETOY。呢套EYETOY由一個視像鏡頭加軟件《KungFoo》組成，能將玩家動作即時擷取入PS2，繼而跟遊戲產生互動。玩家只需將畫面出現如木頭之類嘅雜物，打碎後便可過關，呢種玩法喺幾年前嘅Logictec電腦視像鏡頭已玩過，今鋪翻炒未見新意，唯一好處係利用PS2打機之餘亦可做下簡單嘅運動。遊戲賣價39.99美金（約港幣$300），03年10月推出。
能躋身恐怖經典五大位置，功力自然有番咁上下。Konami呢隻《SlientHill3》繼承過往恐怖玩法登場，獨特之手電筒式黑暗氣氛令人不寒而慄。新作加入更多古怪敵人，其中流血兔仔更屬故事關鍵。
終於打破GC獨佔命運，喺PS2上推出新作。現場雖提供試玩，可惜內容仍係不足，最離奇係六部試玩機座經常無故當機，真邪門。
世嘉最新力作《Virtual-OnMarz》只提供一部試玩機座，從畫面所見知道跟早排香港試玩的一樣，屬Debug版本。
萬眾期待嘅間碟遊戲《MetalGearSolid3》，好可惜只播放Opening影片，並不設試玩。不過從片段可知戰鬥場景由基地困獸鬥移師到森林，大玩史泰龍式設陷阱暗殺敵人，版圖理應比以前更大。
E3EXPO跟東京遊戲展最與別不同地方，並非用鬼妹做ShowGirl咁簡單，而係全個ConvertionCenter都只得極少數ShowGirl，兼且年輕又見得下人嘅更係聊聊可數，筆者幾經辛苦走遍全場，先搵到幾個省鏡啲嘅，跟讀者一齊分享。