電影《六樓后座》下月四日才正式上映，但已經是非不絕，先傳因麥浚龍（Juno）主唱電影插曲，惹來戲份較多的蕭正楠不滿。昨日又傳唱片公司因不滿蕭正楠詐型一事見報，致電電影公司投訴之餘，蕭正楠更不會出席宣傳活動作抗議。
電影公司原定下周五（二十三日）安排《六樓后座》眾演員錄影《勁歌金曲》，讓節目與電影在下月四日同步出街，除周浚偉因身在台灣不能出席外，所有《六》片演員包括林嘉欣、盧巧音、蘇永康、麥浚龍（Juno）、鄧健泓、周永恆和商台DJ森美等都會現身，惟獨蕭正楠拒絕參與錄影。
有指蕭正楠其實在拍攝《六》片期間，已與其他演員鬧得不太愉快。星皓電影公司發言人陸小姐昨日接受電話訪問時，直指蕭正楠不合作，她說：「由頭到尾我哋都唔知蕭正楠會唔去《勁歌》，如果佢連《勁歌》都推，咁我哋真係覺得好唔啱，所有演員當日都會上節目，所有人都好合作，蘇永康特登由台灣返嚟，盧巧音雖然忙緊佢嘅演唱會，但都接受無綫派攝製隊去紅館拍花絮。今次亦都係林嘉欣第一次上《勁歌》，我覺得蕭正楠唔上《勁歌》，係佢嘅損失大啲。」
陸小姐又說：「Juno戲份係唔多，搵佢唱插曲係因為咁啱配合番場戲，絕對唔係話蕭正楠唔好，事實上蕭正楠喺套戲入面好出色，以一個新人嚟講，佢做得好好。我唔知蕭正楠唱片公司有冇打電話嚟詐型，公司有咁多人，唔知佢哋打去邊度。」
而蕭正楠所屬的musicnation唱片公司發言人鄭小姐，昨日則在電話中回應說：「蕭正楠唔上《勁歌》，唔係因為不滿Juno唱插曲，亦唔係因為有咁嘅新聞見報，我哋早喺兩個禮拜前已經推咗。」但為何星皓方面表示不知道此事？鄭小姐說：「我哋一早同電影製片夾好晒，兩個禮拜前我哋已經通知咗製片，有兩個加州紅嘅宣傳去唔到，《勁歌》亦去唔到，其他可以做到嘅我哋會盡量安排。電影公司想做宣傳我哋絕對理解，但佢哋好混亂，𠵱家又搞埋啲古靈精怪嘢。
「蕭正楠唔係唔肯做，而係佢同無綫拍緊電視劇《戀愛自由式》，幾乎四、五月嘅期都畀晒無綫，套劇𠵱家趕緊，蕭正楠又點抽到時間出嚟呢？林嘉欣第一次上《勁歌》，蕭正楠一定會默默支持，如果佢當日喺電視城嘅話，或者會喺廠度撞到呢？」
鄭小姐又說：「總之蕭正楠冇因為唱主題曲或者插曲嘅問題唔開心，公司同佢一樣，都尊重電影公司嘅安排，而且套戲咁多歌星，蘇永康、盧巧音都係佢前輩，機會唔到佢，亦都唔會嬲。我今日係打過電話去電影公司，但唔係詐型，只係了解件事。蕭正楠拍呢套戲冇唔開心嘅嘢發生，相反重有得着，佢因為拍呢套戲同盧巧音熟咗，重會做演唱會嘅嘉賓。」
至於身為是非導火線的Juno，其經理人公司發言人昨日接受電話訪問時說：「Juno會上《勁歌》配合電影宣傳，三個禮拜前已經度好晒期，至於其他人去唔去到，我哋唔知。」
採訪：張止寒
