恒指欲跌還升，埋單有22點進帳。大隻股變化參差，中石化（386）再升2仙，收1.50元。2仙只係1.4%，但啲Call輪唔係咁計。
中石化Call輪9379收6.9仙，升25%；9227收19.6仙，升12%。兩隻輪雙雙打入龍虎榜。9379今年8月到期，溢價3.3%，槓桿率21.7倍。9227今年12月夠鐘，負溢價0.1%，槓桿率7.7倍。正股𠵱家個價，都重係偏低，兩隻Call輪重有得去，9379爆炸力大啲，9227則抵食。不過，「遺憾」嘅係，兩隻輪交投都非常疏落，唔易大手買入。
威水輪有隻電盈Call輪9637，正股（008）升2.9%，9637由1.9仙彈上2.6仙，咁就打入龍虎榜第2位，升幅37%。隻輪今年11月夠鐘，溢價39.4%，槓桿率41.5倍。咁高溢價都有人肯博，係因為重有幾個月壽命，到期之前，正股失驚無神升三兩毫，隻輪分分鐘跳升三四成。炒9637應知所進退，幾個月後，幾乎肯定會係1仙求售冇人吼。
國泰（293）消息不利，股價由9.40元散落8.95元。Call輪9810散18%，收14仙，明年4月到期，溢價14.9%，槓桿率6.4倍，正股不妙，隻輪自然不妙，想買平嘢，等5仙上車，𠵱家未係買貨之時。
章盛