盧巧音（Candy）近日為演唱會密密排舞，fans擔心她體力透支，專誠煲了三壺靚湯給她飲用，令Candy十分感動，但fans和她傾談時，因站出馬路，引來警員查詢。
盧巧音將於下周六及日（二十四、二十五日）舉行個人演唱會，近日她頻頻在九龍城排舞室練舞，fans因為擔心她體力透支，所以特地煲了靚湯給Candy飲用，並一早去排舞室樓下等候偶像。
日前Candy一去到排舞室，便見到fans送上的三壺靚湯，但由於fans和Candy傾談時站出馬路，一度引來警員到場查詢。
而fans送給Candy的三壺靚湯，包括打氣加油湯（即合掌瓜南北杏煲豬骨湯），鴻運當頭湯（即胡蘿蔔粟米煲瘦肉湯）和補氣湯（即花旗參無花果煲豬骨湯）。
Candy收到靚湯後十分感動，她說：「我啲fans全部係第一次煲湯，佢哋知道我唔食牛肉，所以主要用豬肉，佢哋平時會送零食畀我，因為我鍾意食，佢哋又驚我太瘦，想我肥番少少。無論台上台下，fans都咁支持我，有一次我喺台上唱《好心分手》，佢哋全部喺台下唱，嗰一刻好感動。」
而Candy最重要的fans當然非她母親莫屬，她說：「呢排媽咪都好努力煲湯畀我，好似海底椰煲瘦肉咁，其實我唔係好鍾意飲花旗參，但因為可以補氣，所以都會飲，但我鍾意飲鹹嘅花旗參湯。我記得有一次媽咪煲咗海星湯畀我飲，飲完之後我出晒暗瘡，因為太熱氣。」
採訪、攝影：黃文成
