雖說家陣物價大跌，要煮一道平餸不算難，但要平得好，就難度十足。烹飪老師車麗珠，以當造的芒果，自創了兩味十蚊就搞得掂、兼啱晒夏天食的開胃菜。又利用橄欖油及揀選健康的食物入饌。不僅如此，就連賣相都顧及。是集當造、合時、有營、色相等於一身的「便宜菜」。
記者：吳佩璇攝影：陳智良
Model：Alanie、Kin（SunSpot）
芒果家陣當造，所以車老師就用它來入饌。雖然話芒果比較濕熱，但其實佢含有豐富的纖維質及維他命A、C，有防止視力衰退及抗氧化等作用。以下就由車老師醒你揀靚芒心得：
1.揀有些許啡點紋的芒果，這表示其糖份夠，入口必定甜。
2.再聞一下，靚芒果必然有陣芒果香。另外攞上手千祈唔好過腍，會容易腐爛。
3.呂宋芒出名最靚，所謂一分錢一分貨，幫襯生果大檔，逐隻揀一定好過成份買。
車老師貪方便，總會幫襯屋企附近的順利邨街巿。雖然街巿規模不算大，但豬肉夠靚夠新鮮。若以整體種類多兼價錢合理，就推介九龍城街巿，就連潮州及泰國食物都好齊全。至於主婦如何買平餸，則可分享以下心得：
1.當造食物必然又平又靚，家陣的各種瓜類、莧菜、芒果、士多啤梨、龍眼等都合時。
2.趁夜買的平餸，若然是即煮就非常抵買，否則會易壞，執到平嘢都冇用。
3.芽菜、豆腐、雞蛋等都係平而有營兼夠百搭的好材料。
車老師有5個細佬妹，作為大家姐的她，自小已入廚。煮了幾十年菜，練就一手好廚藝，數年前更正式報讀導師培訓班，又到過夏威夷修讀短期課程。前後當了4年烹飪老師，中電、中學親子班、以至《壹週刊》等雜誌專欄，都可見到她的大名。原來她當起烹飪老師來，目的是「想多啲人喺屋企煮飯，唔使食咁多街外添加劑，對身體會好啲！」
車老師對煮食興趣甚濃，年輕時就將錢儲來買廚房用具。最記得20幾年前，她將儲了年多，合共千多元，買了一套上等的不銹鋼低溫煮食炊具。以當時來說是相當昂貴，還給老公責怪了幾句！
鯪魚球好多時都加果皮煮，但車老師就破天荒將鯪魚肉配甘笋，更具色相、夠健康、又有創意。再配紅椒及當造的新鮮芒果，單看賣相已覺清新醒胃。就連調味也配合芒果的酸甜味道，以醋和糖做主打。入口酸酸味味，啱晒夏天食。車老師話如果捨得花錢，可將鯪魚肉改為石斑肉，那就更爽更清甜。
用咩料：
芒果2個、鯪魚肉200克、甘笋40克（切粒）、葱8條（切段）、紅椒半隻（切絲）、蒜茸1粒
調味：鹽1/3茶匙、糖1茶匙、醋1茶匙、生粉1茶匙、水4湯匙
這道沙律不用新鮮芒果，反而採用了切絲芒果乾，更見特色。而車老師發揮一貫的創意，將香港人平時喜歡用來打邊爐的芋絲，加入芒果乾絲、酸薑絲、青瓜絲、紅椒絲等雪凍來吃。調味汁則用橄欖油加蘋果醋，務求消暑之餘又健康。
用咩料：
芒果乾20克、酸薑20克、青瓜80克、紅椒半只、芋絲1盒（約218克）
調味汁：鹽1/2茶匙、蘋果醋1湯匙、橄欖油11/2湯匙
下廚經驗豐富的車老師認為煮餸要好味道，有3大注意的地方：
1.中菜鹹些少、淡些少，看似沒大所謂。但入廚初哥，還是最好依足調味份量，這樣煮出來的味道才不會差之毫釐，謬以千里！
2.要留神昅實火候，煲湯或燜嘢都最忌中途加水。
3.盡量買新鮮材料。即使是買急凍材料，也不要太過腍身或啞色。