恒指跌15點，好似好細，但有啲藍籌都有啲波濤，榮辱非常明顯，例如長實（001）升30仙而和黃（013）跌1元，中移動（941）跌45仙，可以話係芬佬做咗揸弗人，由佢哋玩晒。
中移動回落幅度2.6%，中移動Put輪得槓桿效應之利，有5件打入10大龍虎榜，交投最旺嘅9727，有80球易手，收14仙，彈升20%。隻輪8月到期，溢價6.8%，槓桿率11.9倍，咁嘅數據可以接受，再升唔升得當然同正股升跌掛鈎。正股近期由低位14.55元彈上去，見17.25元回頭，有機會落到16元邊邊，9727重有小小水位。唔想執呢啲水位嘅利潤，則不妨吼低揸Call輪，對象有9770同9754。9770喺9月到期，現價23.8仙，溢價4.7%，槓桿率7倍。9754亦係9月夠鐘，現價15.6仙，溢價8.8%，槓桿率10.6倍。
港交所（388）派首季成績表，好多人估中賺少咗，由9.70元散落9.15元。Call輪9630由2仙跌到1仙求售但冇人要，行使價11.88元，下月初到期，就算正股昨日唔跌，隻輪到尾都係化為零機會好大。同類輪9537由9.5仙散落6.8仙，7月到期，溢價4.5%，槓桿率13.5倍。正股業績走下坡，PE去到接近20倍，好難有乜作為，港交所Call輪冇乜邊隻值得買。
章盛