由於美國科技股反彈，本地好多科技股甚至半導體股亦跟隨，好似ASM太平洋（522）已經升咗唔少。經紀陳叫小初留意品質國際（243），話隻股亦可能借勢炒上。
品質舊年10月同埋今年2月兩度配股，配股價分別係1.50元及1.52元，第二次配股後，股價曾一瀉如注，但好快就抽回1.50元樓上。
經紀陳話，市場傳聞檸檬茶嘅關連人士染指品質，所以唔愁冇得炒作。
另外，小初早兩個月提過泰興（389）有意配股，但被有關人士否認。本周初又寫過隻股轉咗由一間外資行睇場，所以股價升得咁靚。噚日收市後無耐，傳出批股，究竟係不認不認還需認，定係有證券行建議配股呢？
經紀黃話，泰興今次以先舊後新方式，每股作價3.50元，配售4000萬股，集資金額1.4億元。按配售代理嘅往績，配完股之後股價通常頂得住有餘，部份更有意外驚喜，所以佢唔擔心泰興批完股之後，會好似早前高寶綠色（274）跌穿配股價。
慕容小初