又到一年一度嘅E3EXPO，呢個比東京GameShow更大規模嘅展覽，每年都吸引唔少廠商參展。微軟今次並不如傳聞有新XBOX，不過就以大量新Game及《Halo2》、《PGR2》兩款名作續篇為撒手鐧。最矚目係展示一款全新多媒體周邊MusicMixer。今次我哋用特別渠道，喺展覽正式開始前一日潛入會場，為大家送上第一手資料。
記者、攝影：徐影龍、周達之
XBOX會場設於SouthHall，佔地屬全館最大，雖然並冇傳聞中嘅新版XBOXLite出現，不過仍有大量勁Game新作及續篇登場。要數最矚目嘅Game，首推《Halo2》及《PGR2》兩款續篇。
現場中並未見到《Halo2》提供試玩，不過就設有多個屏幕，不斷播放《Halo2》影片，吸引不少人士駐足觀看。從影片所見，《Halo2》繼承一貫動作加射擊玩法，畫面及光源效果均做得非常之好，舞台方面亦打破舊有框框，由荒郊移師到高科技市鎮，以城市戰為主，版圖更大更複雜，而電腦之AI及不同分布位置令難度大幅提升。新作已對應XBOXLive嘅連線功能，雖然暫時未知會否加入新戰鬥模式，不過肯定有唔少新穎武器登場，如雙槍出擊、特大號雷射炮等。值得一提係今集依舊可使用飛機戰車等工具，穿梭城市之間戰鬥，頗為爽快剌激，最搞笑係加入考牌元素，揸車都要考咗牌先得。
以挑戰賽車Game霸主《GT4》為目標，XBOX呢隻《PGR2》愈出愈正，場景建築物及跑車均做得非常仔細，光源效果亦好像真，相信全賴強勁圖像晶片之助。現場試玩中只玩到莫斯科、愛丁堡等四條新加跑道，最期待嘅香港跑道仍未提供試玩。車種方面，有齊法拉利、MiniCooperS、Lotus340R等靚車，每部車設定都好唔同。試玩過後，感覺上遊戲像真度比舊作更為真實，唔同嘅車甩尾過彎等技巧都有別，對應XBOXLive令玩家可下載世界高手紀錄到XBOX上，以幽靈（Ghost）形式登場，供玩家挑戰測試實力，又或參考最佳行車線等。
E3EXPO今年已是第九次於羅省ConventionCenter舉行，跟往年一樣，分South、West同Kentia三個場館，面積亦是大得驚人，跟全球最大電腦展COMDEX有得揮。筆者猶記得99年第一次採訪E3EXPO時，在開幕前一日潛入會場，率先為讀者報道第一手消息。由於今年有DreamStore之助，以參展商身份登記，可名正言順開幕前一天進入會場，為讀者報道最快最新嘅News。
微軟剛收購著名製作商RareWare，喺今年E3EXPO上已有三款作品登場，而且全屬拿手好戲嘅動作類型。其中《GrabbedByTheGhoulies》及《ConkerLive&Uncut》同為卡通風格嘅動作Game最為搶眼。
《GrabbedByTheGhoulies》
講述主角莫名其妙去到一間充滿鬼怪嘅大屋內，以拳腳及身邊物件跟妖怪戰鬥。遊戲畀人感覺頗為爽快同過癮，漫畫式交代劇情幾有新鮮感，相信可吸引唔少年輕機迷。
《ConkerLive&Uncut》
主角是一隻松鼠，穿上軍裝拿着武器，如機關槍、萊福槍、火箭炮等在各種地形中與其他對手進行槍戰，由於各種武器火力不同、子彈數量不同，但又只可選擇其中數種來作戰，要運用得宜來取勝也相當考腦筋。
《XSNSports》
現實生活中要組隊參加球賽的確是十分花精神時間的，《XSNSports》提供一個網上運動平台，透過XSNsports.com，玩家可以創造屬於自己的聯賽或在網上與世界各地其他玩家在網上進行實時較量。
《恐龍危機3》
CAPCOM招牌動作Game移師至XBOX，聲畫表現當然更勝一籌，最特別係今集舞台改為充滿科幻感嘅地方內跟恐龍搏鬥，主角亦新加噴射飛行器，相信版圖設計將更為複雜。
《鐵騎大戰》
CAPCOM另一大作《鐵騎》，亦加入Online功能推出新版本《鐵騎大戰》。會場內一共設有六部大機作連線對戰，好有氣氛。
《SonicHeros》
世嘉今次並非有太多對應XBOX嘅新Game，除同樣舊Game加Online翻炒嘅《SegaGTOnline》外，較為吸引只有呢隻《SonicHeros》。今集打破慣例，一次過控制超音鼠三名角色，要攞齊金環過關，相信難度會更高。
《NinjaTurtle》
經歷十多年，忍者龜受歡迎程度依然不減，XBOX版本的《NinjaTurtle》屬於類似《FinalFight》的橫向打鬥遊戲，打低嘍囉再打大佬，玩法簡單。除了忍者龜們一起對抗敵人外，亦有兄弟互相較量的對打模式。
喺E3舉行之前兩日，微軟率先搞咗個記者發布會，招待逾千名中外傳媒到場採訪，率先披露E3有咩正Game。會場內有大量XBOX美女，整個發布會以TalkShow及播片形式進行，由EDFries為首的三名製作人作介紹。除之前已介紹之新Game，發布會上重公布如《Doom3》、《TureFantasyLiveOnline》兩款大作，每當介紹新Game時，全場都以熱烈拍掌、叫囂甚至吹口哨附和，情緒相當之高漲，睇嚟XBOX喺外國嘅地位真係好高。至於新登場之周邊MusicMixer，簡單講就將XBOX連接至PC上，自行下載音樂及相片，喺XBOX上欣賞，最搞笑係附有咪高峯及字幕功能，將XBOX搖身一變成為卡拉OK。