陳四萬時代，退休高官不愁出路；時移世易，五十幾歲要搵個位並唔容易，即如去年離開官場後，齊入信和置業打黃志祥工之梁世華及劉玉權，未及半年已起晒身。
梁世華做過政務總署、城規會，又駐過東京做貿易代表，同商界地產界有一定關係，照理應該比較易適應信和份工。佢服務政府三十一年，退休前為康文署署長，據聞黃老闆非常賞識呢位「AO黎明」，親邀佢加盟，主管租務部。記得梁世華返工兩月後話，商界雖然講效率，但佢完全適應新環境。
劉玉權則喺政府做咗三十七年，比梁更長，劉去年十月退休，之前官拜警務處副處長，僅在一哥曾蔭培之下。佢同梁世華今年一月二日入信和，職銜俱為總經理。劉玉權負責物業管理工作，照計成個警隊都管得掂，管「實Q」話咁易啦。
不過官場同商場始終唔同，做官最多俾人「當動物咁睇」，私人機構呢，等於入咗鬥獸場，唔係人人頂得住。
傳真︰2623-9278
電郵︰