香港地方細細，但有好多世界第一，好似信和嘅小西灣藍灣半島都有個世界第一。藍灣廣場放咗兩個全球最高同最大嘅扯線大白兔，足足有三十三呎高。
信和集團租務部總經理陳昌傑話，呢個係佢哋同演藝學院合辦「醒目仔魔法奇遇記」其中一部份，係一個寓教育、親子、娛樂同消費於一身嘅活動。
「醒目仔魔法奇遇記」總共用咗超過一百萬元，提供十幾種互動遊戲、戲劇同舞蹈表演。今個禮拜六日，去藍灣廣場就有得玩，信和估計可帶動商場人流再創新高。
另外，信和啱啱喺禮拜一結束嘅屯門市廣場「信和商戶心連心開倉大行動」，因為反應好，所以今日起再度添食至禮拜日。今日請到藝人張燊悅出席做愛心之星；禮拜日就有何韻詩、鄧健泓同Shine等做嘉賓。
今日做代理，點只淨係識賣樓，腦筋要靈活，應變又要快。好似九倉九龍站擎天半島，啱啱開放新示範單位，用六十年代風靡一時嘅Beatles「披頭四」樂隊做主題，吸引唔少中年客去睇樓。
中原地產食住個勢，即日起到今個月底，透過中原買入該盤嘅買家，就送一套價值成八百九十蚊嘅「披頭四」歌曲全集，有腦兼有噱頭。
中原黃偉雄話，買得擎天嘅買家，年紀有番咁上下，聽番「披頭四」嘅歌，別有一番滋味。
發展商早排猛吹風本月會開售新盤，但5月已經過咗一半，最大機會推出嘅係恒基同新世界合作嘅元朗綠庭園（即蝶翠峰三、四期）。
發展商將蝶翠峰一、二期貨尾交畀中原地產做獨家，賣出過百伙，所以請中記高層，喺元朗大榮華食飯慶功，重請嚟「日日有食神」主持，兼有大榮華食神之稱嘅韜哥（梁文韜）親自撰寫菜單。
中原董事王浩聰話，總共有九道菜，每道都有唔同嘅名堂同寓意，韜哥逐一講解，好似「炒長遠（粉絲）」，即係指（中記同發展商）關係長遠咁解；「雞冠魚鰾炒韮菜」寓意係凡事有順（雞冠魚鰾）有逆（韮菜）；「豉汁蒸邊魚」係代表要逆流向上。聽講最受歡迎嘅係豬油撈飯，恒基張炳強食咗四缽。
王浩聰又透露，今個禮拜五，發展商又喺同一地點再請食飯，屆時好似話會有綠庭園嘅開售消息公布。
尖沙嘴南洋中心今年總共有七宗租務成交，租出樓面兩萬七千幾呎，平均呎租約九蚊，單係今個月第一個禮拜，就佔咗兩宗，涉及樓面近九千一百呎。
美聯物業九龍商業部高級營業經理黃璜話，其中六樓一號同六號室，面積六千七百九十九呎，呎租只係六蚊，創新低，原因係租期只得一年，約滿後業主就會收番嚟自用。
黃璜指出，南洋中心租金已經比同區商廈低一成，管理費喺今年第一季兩度下調，幅度有一成九，對租客自然好吸引。
𠵱家經濟唔好，每逢有招聘會都人頭湧湧，長實執行董事趙國雄話，噚日借咗紅磡國際都會商場畀政府搞招聘會，旗下兩間物業管理公司港基同高衞都有擺攤位，打算請九十人，下晝已經收到超過一百個申請。
不過趙國雄話，呢啲咁大型嘅招聘會一年先得一次，唔係好夠，長實每隔一段時間就會請人，𠵱家計劃下個月底至七月初搞招聘會，職位空缺有成二百個，包括保安、物業管理、清潔監督、置業精英等，月薪介乎六千到八千蚊，應該吸引唔少畢業生，相信會好熱鬧。
蘭西
電郵地址：
