朱茵、男子組合Shine成員之一黃又南、李蘢怡同杜汶澤等，前日喺南丫島拍攝網劇《男女字典》。《男》劇係講二、三十歲男女嘅感情生活，內容都幾大膽露骨。而朱茵同李蘢怡自然就負責賣弄性感，佢哋兩個前日都着住小背心，大騷豐滿嘅身材，吸引唔少男人眼昅昅。杜汶澤就好識歎，喺唔使拍攝嘅時間，就踩吓單車，睇吓風景。
不過，《男》劇嘅工作人員前日就好燥，不停阻擋記者影相。有雜誌記者重同工作人員發生推撞，事後有人報警求助，警方派警員到場調停。
另外，廖啟智一家前日趁好天氣，重去咗南丫島「避炎」。
港姐冠軍林敏俐噚日接受新城家燕姐電台節目電話訪問，回應佢哋五位港姐同無綫監製飯局一事，佢話：「根本係Rosa（港姐統籌經理）想我哋藉呢次食飯，多謝各個監製呢年嘅支持，因為今年我哋幾個嘅工作量真係幾多，而嗰幾位監製之前已經識，大家亦合作開。」
羅嘉良同無綫合作十六年終於決定離開娘家，同寰宇集團簽咗經理人合約，今次能夠吸引撈家嘅最大魔力，係佢日後可以喺幕後參與更多意見，一講到酬勞方面，一向好口密嘅撈家日前笑笑口話：「有八位數字。」難怪呢位前無綫一哥會轉投寰宇啦！
近日有報道話許志安因為拍電影《給他們一個機會》而同片中嘅天幕新人、比佢細十三歲嘅鄧肇欣（Ellis）拍拖。Ellis經理人Pauline噚日喺電話訪問度講：「成篇報道冇一樣係事實，佢哋冇任何聯絡！至於話Ellis日蒲夜蒲，嗰日其實佢同啲朋友發現有狗仔隊跟，於是就好彷徨咁轉的士，咁啱就喺蘭桂坊。」而安仔經理人公司噚日就話一笑置之。
陳文媛（BoBo）同唐寧噚日喺赤柱拍攝電視劇《戀愛自由式》。噚日有周刊報道指喺劇中演佢哋媽咪嘅鄧萃雯同鄧浩光喺赤柱餐廳食飯撐枱腳，不過，BoBo同唐寧都異口同聲話知道件事，BoBo話：「嗰日佢哋喺赤柱收工，順便食飯，雖然我冇份去，不過唔使理啲報道啦。」
