美股周二晚壞消息多過好消息，但美股只係大漲小回，杜指跌47點，收8679，納指更是幾乎收復全部失地，只微跌1點，收1539。
睇完美股周二晚走勢，趙飛雲預咗噚日恒指會挾高，皆因前日港股冇跟美股升，好大原因係市場預期沙地外國人地區受恐怖襲擊，會拖累美股大跌，但美股周二晚跌幅輕微，刺激港股追回落後。
恒指噚日開市果然挾上，最高升至9217，倉內恒指Put輪9698低見0.13元，趙飛雲考慮過跳車，好彩恒指升勢短暫，迅速調頭回落，但鬆一口氣之餘亦唔敢低位加注，因為怕係陷阱，早市中段期指一直在9160附近橫行，有啲似係收集淡倉，不過中午收市前淡友攻破9160防線，形勢對淡友有利。午市恒指果然跌幅擴大，低見9069，補回周一上升裂口9150至9084，但高興咗唔夠1刻鐘，又見期指反覆回升，帶動恒指跌幅收窄，最後收9103，跌15點。9698平收0.145元，溢價又縮0.1%。
期指收9140，高水37點，今日港股點走唔易睇，但滙豐（005）及中移動（941）嘜高收市價手法，唔似係真正大戶所為。加上5大藍籌的技術形態利淡，中移動（941）及和黃（013）沽壓開始加大；長實（001）及滙豐有強弩之末的迹象，新地（016）稍好，但影響力不大。恒指先下試8900的機會較上試9300為高，所以仍按先前部署，繼續持有9698。
趙飛雲