又關SARS事？無錯！喺呢個咁講求乾淨衞生的時候，清潔用品真係大過天，由頭髮、面、手到身體都要洗乾淨。不過樣樣都要錢，喺慳得就慳的大前提下，學吓做清潔用品，如潔面卸妝洗手沖涼用品等，保證個人衞生之餘，荷包又可以慳一筆。
記者：羅惠芬
攝影：黃子偉
ImageGirl：Gloria
用果皮沖涼，皮膚會變得有光澤兼滑手，因為皮膚吸取了水果中的不同維他命，其中豐富的維他命C，更有預防皮膚氧化的功效㖭！
方法：將柚、橙和檸檬三種水果拆肉後，洗淨果皮，放於水中浸約10分鐘，就可以浸浴，毋須用其他沐浴液，待浸15分鐘後用溫水沖身。
評語：齋用生果皮浸身，好似無用梘液咁乾淨，不過啲味道就好Fresh。
夏天的猛烈陽光，好易曬到皮膚又紅又腫。原來平時沖奶茶的紅茶包，係因曬傷而造成紅腫皮膚的特效藥。
方法：將2-4個茶包用熱水沖出濃茶後直接淋身；又或將手、腳浸數分鐘，緩和刺痛感覺。
評語：紅茶味幾香，尤其模特兒剛巧受曬傷之苦，話用完啲皮膚真係無咁刺痛。
番茄營養價值爆晒燈，蛋白質、碳水化合物、纖維、維他命A、C等樣樣齊，尤其它含茄紅素成份，是一種強力抗氧化劑，有助延遲老化和平衡水份及油脂分泌。只要稍加變化，就可以自創潔面、美白等「扮靚」配方。
方法：將1-2粒迷你番茄搗成漿後，加入約1-2茶匙杏仁粉攪勻，就可以當成天然潔面產品，塗在臉上輕輕按摩約5分鐘，再用清水洗去。
評語：洗完面皮膚感覺清爽，唔會繃繃緊，不過控油作用就唔係好覺。
一般化妝品都係油溶性，所以卸妝產品一般都係油質。唔嫌麻煩的可以因不同性質皮膚自製卸妝油。精油雖然好，但價錢偏高，可到藥房去買皮膚專用的橄欖油當卸妝油用，除落妝效果好，重有防皺、滋潤肌膚作用。
方法：在化妝棉上滴兩滴橄欖油就可以開始卸妝。
評語：原來橄欖油落妝真係好掂，就連最難落的防水化妝品，都可以卸得乾乾淨淨，不過就稍嫌油咗啲。
平時經常聽人用牛奶浸浴，原來亦可以用來洗頭，令頭髮烏黑發亮。平日用得洗淨力強的洗頭水，好易令頭髮失去油份。用牛奶洗頭就好滋潤，重可以去頭皮，因為牛奶所含的酵素就能對付頭皮屑。
方法：用棉花浸泡牛奶後，慢慢塗抹在頭髮上，然後按摩、沖水。每星期可進行2次。
評語：用牛奶洗頭感覺好高貴，洗完啲頭髮真係幾柔順，不過好似無咩去污功效。
橙皮有清潔、清除油脂及辟味等作用，更可以去除死皮。純乳酪則含溫和且天然的果酸，有助促進皮膚新陳代謝。用純味乳酪混合橙皮自製洗手用品，就可以令雙手又乾淨又柔嫩喇。
方法：先將橙皮切粒，待風乾或用微波爐弄乾後，混入純乳酪中攪勻。又或可以將橙皮磨碎，令質地更幼滑。
評語：好滑！成隻手都滑淨咗好多！不過製作過程就太繁複，比想像中耐。