懶理群起攻擊繼續瘋狂
Manson玩連體怪姝　驚嚇！

日前啱啱出咗新碟《TheGoldenAgeOfGrotesque》嘅MarilynManson，佢嘅出位言行成日受到美國嘅衞道之士同家長抨擊。
不過Manson一於少理，今次嘅新碟繼續玩恐怖同狂野嘅搖滾，重加送一隻自導自演半個鐘長嘅短片DVD，不時扮到成隻鬼咁，又搵兩個女人着住特製嘅衫，扮到好似全裸嘅連體怪姝咁，一定嚇親唔少人。
而早排喺奧斯卡電影頒獎禮狂抦美國總統布殊嘅導演米高摩亞（MichaelMoore），又力撐Manson，佢話Manson宣揚恐怖死亡嘅歌，唔係引致暴力事件嘅罪魁禍首。

青年愛搖滾
我羅拉早排睇咗米高摩亞嘅奧斯卡得獎紀錄片《美國黐Gun檔案》，套戲探討美國好嚴重嘅槍殺案問題，令人意外嘅係被指教壞細路嘅Manson，喺套片入面接受咗米高嘅訪問，講嘢竟然有紋有路。
米高好客觀咁分析喺加拿大同德國，有大把年輕人鍾意宣揚死亡訊息嘅Gothic搖滾樂，而且呢兩個國家嘅槍殺問題唔似美國咁嚴重，所以叫大家咪屈Manson喎。