健康保衞戰
同BB按摩強肺增免疫力

近日有朋友向我訴苦，話俾個「沙士」搞到好煩。因為屋企重有個幾個月大嘅BB，用多少少漂白水都怕對佢有壞影響，最煩係唔知點幫BB做好預防措施。有見及此，我就開始幫手搵解決良方，結果俾我發現，原來幫嬰兒按摩，可以強肺兼增強免疫能力，而且簡單易學，各位父母不妨跟住做，令BB身體更強健，減低感染的機會！
記者：黃婉冰
攝影：林栢鈞
ImageGirl：Kaman
ImageKid：天樂
鳴謝：強生媽媽大學堂註冊護士馬婉文

按摩加促血液循環
嬰兒按摩不但可以增進親子關係，令BB心情放鬆較易入睡。按摩更可以幫助加促血液循環，有助新陳代謝，紓緩情緒壓力，令免疫細胞保持活躍，可以防禦病菌的侵襲。

由頭到腳按摩六部曲
父母每天只需要用十多二十分鐘的時間替BB按摩，每個動作大約按摩五至六次已很足夠，便可將BB感染病毒的機會減到最低，同時又可以促進感情，一舉兩得。

（一）按胸促進心肺功能
雙手放在胸部中間，以心形動作向左右兩邊推撫。
有乜用：幫BB適當地按胸口部位，可以強肺之餘，亦有助促進血液循環，促進心肺功能。

（二）按面助肌肉鬆弛
用大拇指在BB的下唇邊部位作一個劃笑容的動作，然後在人中位置，沿住上唇邊向下按。
有乜用：有助紓緩因出牙仔而帶來的牙肉不適，亦可令臉部肌肉放鬆。

（三）按腹幫助消化
用手掌的外則向下按摩肚部，一隻手緊接另一隻手；然後用指尖慢慢由左輕按至右。
有乜用：BB經常會因飲奶而有肚風，按腹部可以消除肚風外，更可助長腸胃管道活動，釋放胰島素，令BB更易吸收食物的營養成份。同時亦可強化消化系統，令大便暢通，減低便秘的機會。

（四）按腋窩增抵抗力
先用一隻手托穩手部，另一隻手由肩膊至手腕來回按摩；另一隻以相同方法按摩。按完手部便輪到按摩腋窩，可舉起BB手臂，撫按腋窩下方部位數次，最後按腋下的淋巴結。
有乜用：按手可以令肌肉結實，對將來手部的發展及活動有幫助，而腋窩部份有較多淋巴，加以按摩可以增強抵抗力。

（五）按腳強化骨骼
可用一隻手托着腳踝，另一隻手由大腿至小腿上下循環按摩，在厚肉位置如髀位同小腿肌肉部位可以大力一點，但膝蓋內側同關節位則不宜按摩。
有乜用：有助強化腳部的骨骼，增加柔軟度，對BB將來學行有很大幫助。

（六）按背促進脊骨健康
先將雙手平放在脊骨頂部，手掌的外側與脊骨成直角，雙手一先一後沿脊椎向下按摩至臀部，再回到肩部重新開始，來回重複按摩。
有乜用：同樣可以強化骨骼，令脊骨健康，同時可以讓BB學習自己支撐身體。對於只有三個月或以下的BB，可讓他們學習自己抬頭。

按前準備：
BB潤膚油搓暖手心
按摩前應除下所有首飾及以梘液清潔雙手。按摩前可先塗上嬰兒油或潤膚露，一來可以保持雙手濕潤，亦可減低按摩時所產生的摩擦。塗上嬰兒油後應先將雙手輕搓至手心溫暖，然後才將雙手放在BB身上，否則冰冷感覺會令BB不舒服。

預備毛巾及尿片
每次按摩時最好保持室溫在23至25度，盡可能不要開冷氣或風扇，以防BB因而着涼，冬天時應準備暖爐。按摩時最好在床上放上尿片，因很多時BB會因按摩時受到刺激而有瀨尿的情形出現。

按時須知：
1﹒動作要一氣呵成
每次按摩為時約15至20分鐘，雖然並非要強制性完成所有部位，但每次都要一氣呵成，否則會令BB感到無所適從。父母按摩時不妨同BB傾偈或播放輕柔音樂，這亦有助BB放鬆。

2﹒力度要平均
最好用一個自己及BB都感到舒服的手勢和力度去按摩，力度要由輕至重，開始後才慢慢加強按摩力度，力度均勻及動作要純熟都是很重要的。

小貼士：按摩形式因年齡而異
嬰兒按摩一般可以做到BB八至九個月大，剛出世還連着臍帶的初生嬰兒則不宜按摩。最好還是等到臍帶脫落後進行，太飽或太餓都不宜進行。當BB懂得四圍爬或轉身時，媽咪可以用另一個形式去配合他們，例如在與BB玩耍時以玩耍的方式替他們按摩，抱他們時輕按腳部、手部等都是令BB較易接受的按摩方法。