前日米蘭打吡賽好唔好睇見仁見智，但見到球員嗰份拼搏心同埋賽後真情流露，都不枉波友捱眼瞓睇波囉。不過國米件大塊頭馬達拉斯屢次向對方球員又撞又踢，咁狼死就認真礙眼嘞。
呢場波球證出示咗五面黃牌，又曾經要求雙方隊長叫隊友冷靜啲，但成場波仍然有好多過火埋牙鏡頭。淨係睇馬達拉斯一腳踢中舒夫真高大髀內側，凶狠程度連AC鬥牛㹴加度素都唔係嗰皮。雖則踢後衞有時硬朗啲可以接受，但似乎過咗火位喎。點都好，班球員響比賽期間有幾次幾乎講手，但完場後惺惺相惜，AC球員重主動安慰國米球員；再次見證球場雖然係英雄地，不過就無隔夜仇。
意甲基爾禾上季升班後無論球迷同輿論都對佢哋讚多過彈。正因聲譽好，最近就獲㗎仔垂青，下個月會去仙台踢友賽，搵吓yen。講開仙台，由於係舊年世盃意大利大軍嘅基地，所以吸納咗大棚意大利球迷，會員都有成萬人，相信日後會有更多意甲球隊去嗰度踢友賽。
佐敦同巫師反面之後。日前即刻有報道話76人教練布朗希望佐敦能夠嚟費城，自己甚至願意將球員事務副總監一職畀佐敦，布朗認為艾華遜好尊崇佐敦，佢加盟無論對艾華遜同76人都有好處。但佐敦同艾華遜都咁好勝，合作嘅話隨時爆出「火花」，一山不能藏二虎嘛！
由列斯過檔曼聯嘅李奧費迪南，原本喺利茲有間吧，但經已關門大吉。李奧間吧之所以執笠，係因為列斯球迷嬲佢出爾反爾，曾承諾會一世效力列斯，點知踢咗兩年唔夠走頭，於是唔再幫襯佢間吧。嗱，呢個故事教訓職業球員，球迷係佢哋嘅米飯班主，得罪佢哋盞搵嚟衰。
利物浦下屆雖然踢唔到歐冠盃，但係佢哋法國籍領隊侯利亞重會喺呢個暑假班兵，而最近消息話佢想簽歐塞爾嘅法國前鋒施斯同法國後衞保桑。咪話我求大俠唔提醒侯利亞，佢上屆喺法甲聯簽番嚟嘅法國中場捷奴同塞內加爾中場戴奧及前鋒迪奧夫，似乎都唔係太掂，唔好淨係識得向自己祖家挖角，應該向其他聯賽嘅球員埋手。
馬賽嘅前法國國腳後衞拿保夫話佢下屆會去卡塔爾掘金，效力艾沙特一年。但係喺西亞踢波並唔容易，早排簡察斯基同索科就因為交唔到功課，結果俾艾希拉炒魷魚。我求大俠勸拿保夫咪諗住過去踢風流波，如果達唔到要求，真係天皇都冇面畀！