屯門醫院的謝婉雯醫生，因治療非典型肺炎病人不幸染病去世，令不少香港人既感動又神傷，並因而得悉她背後一段動人的愛情故事。昨日無綫、星皓電影及寰亞電影公司，均表示有意開拍關於謝醫生的故事，星皓更屬意由張曼玉演繹謝醫生的角色。
香港在非典型肺炎肆虐下，已先後有兩名醫護人員因照顧病人不幸受感染而喪生，前日去世的屯門醫院女醫生謝婉雯，背後更有一個感人的愛情故事。無綫、星皓電影公司和林建岳的寰亞電影公司，均表示有意拍攝謝婉雯的感人故事。
星皓老闆王海峰昨日接受電話訪問時，表示對謝婉雯不幸病逝一事感到十分惋惜，他說：「我了解過謝婉雯嘅故事，真係幾感人，如果真係落實開拍，我希望喺許鞍華、關錦鵬同羅志良三位導演之間搵一個嚟拍，原則上電影包括謝婉雯中大畢業後，喺屯門醫院認識咗陳偉興醫生，兩個人拍拖，佢婚前明知未婚夫有血癌，仍然願意步入教堂同佢結婚，到婚後老公病發不幸喪生，佢仍然堅強地活下去，重主動要求去救治SARS病人，最後連自己都不幸受感染犧牲性命。
「佢嘅經歷好偉大同感人，如果由張曼玉做呢個角色就更加有說服力，相信個劇本吸引嘅話，Maggie（張曼玉）可能有興趣演出，不過因為籌備資料需時，最快都要年尾先可以開拍。」
而寰亞電影公司負責人莊澄，亦計劃開拍有關醫護人員的電影，他昨日接受電話訪問時說：「謝婉雯醫生嘅故事係有拍嘅價值，但拍呢種戲要做好多資料搜集，因涉及死者同佢嘅家人，我哋要處理得好小心，等成熟啲會再同大家講。」
此外，無綫方面，近日亦計劃開拍醫護人員在非典型肺炎肆虐下的各種感人故事，兩位因救人而染上SARS病逝的醫護經歷，亦可能被搬上螢光幕。
昨日無綫製作助理總監（戲劇分部）梁家樹在電話中說：「其實無綫一直都有開拍以醫護人員為題材嘅劇種，好似《妙手仁心》咁，最近SARS影響得香港人咁厲害，啲醫護人員咁辛苦去照顧病人，真係好偉大。不過最近醫管局好忙，我哋拍醫護人員題材一定要搵醫管局協助，但呢輪佢哋冇時間招呼我哋，要攞料都要遲啲先得。𠵱家啲編劇重未寫好劇本，所以未知有幾多個SARS個案嘅古仔會擺入去，而謝婉雯醫生個案亦係考慮之列。」
梁家樹續說：「今年初我已經想拍一個無國界醫生嘅劇，想搵古天樂做，但佢一直冇期，𠵱家非典型爆發，我覺得可以改番拍香港醫護人員嘅劇，男主角都係想搵古仔做，但未知佢幾時先有期，如果等唔到佢，可能搵番《妙手仁心》嘅班底演出，預計下半年可以開拍。」
採訪：陳月媚
