最近非常努力地在吃飯，除了在家吃飯，便是約一些久未見面的朋友吃飯。
有一些飯局是幾年前已約定，所謂約定是指：「喂，搵日食飯」，那個搵日，就是今天。的而且確，這一陣子大家都沒那麼忙，平時飛來飛去飛得比空姐更密的朋友也滯留了在香港，大家除了每天看新聞外，便是望天打卦，所以約會日子比較容易訂下來，只需有幾日通知，大都能夠赴會。
以往的飯局大多是有目的的，閒話家常與幾聲問候通常都是撥電話搞掂，出得嚟約食飯咁大件事如無意外都一定有嘢傾，但最近參與的聚會最優美的地方就是無題，大家或久未見面，又或是識咗十年但原來未同枱食過飯，在毫無主題、機心的情況下，大家冇嘢講就食好嘢，傾傾吓發現傾得埋就開始主動發言。大家由冇嘢講開始到有嘢講，分享了在不同崗位對同一件事的看法，時間在不知不覺的愉快氣氛中很快就過去。
有些人仍怕沙士不敢出外吃飯，提議可以打邊爐，自己親手把食物灼熟，心安理得，再係驚嘅，最多自己一個人柯打一個私家游泳池，冇其他筷子插入嚟，應該冇問題嘞啩？
幾個飯局下來，得出一個類似的感覺，大家當然擔心沙士的後患，但很大部份人覺得長遠來說，沙士對香港可能是好的，起碼已經將大家由疏離拉了回來聚在一起，集思廣益永遠都是件好事，就算沒有甚麼真的裨益，重新懂得珍惜身邊的親人及朋友，過一些開心愉快的時光，食一些冇渣的靚肥牛，肯定是好事。