鄭秀文（Sammi）同古天樂呢對緋聞情侶原本上個禮拜要開工拍電影《戀上你的床》，不過因為Sammi哮喘病發作，加上非典型肺炎肆虐，所以Sammi要求部戲押後拍，如無意外下個禮拜就可以開工，早兩日兩個主角已經試埋造型。
《戀》片導演陳慶嘉話Sammi同古仔喺戲入面做情侶，而蔡卓妍（阿Sa）同劉青雲亦會做一對戀人。
另外，中國星畀成五百幾萬Sammi拍呢部戲，戲份梗係集中喺佢身上，佢同古仔有一場床上戲，重要肉帛相見㖭，監製錢小蕙噚日話：「場戲意識上係幾大膽，拍出嚟嘅感覺要佢哋肉帛相見，但到時點拍，始終要同Sammi、古仔傾，我哋點都要尊重兩位主角。」
早前蔡依林（Jolin）推出嘅《看我七十二變》大碟喺台灣大賣，重連續九個星期站穩銷量冠軍寶座。Jolin開心之餘亦不忘幫助喺台灣患非典型肺炎嘅病者同全部醫護人員，Jolin決定喺嚟緊星期日（十八號）舉辦「說愛你音樂會」，希望為病人同醫護人員打打氣，發揮撫慰人心嘅作用。
台灣八十位歌手將會聯手錄抗炎歌，有份參與嘅歌手包括陶喆、王力宏、周杰倫同李玟等，周杰倫同李玟雖然喺馬來西亞同美國，但佢哋都會喺當地錄音。首歌由陶喆同王力宏作曲同填詞，佢哋拍心口話喺四十八個鐘頭之內會搞掂首歌，𠵱家暫定呢個星期五拍MV同錄音。
楊恭如噚日同佢媽咪喺金鐘太古廣場出現，佢話遲啲要拍新片，片場人多所以噚日打算去買部紅外線探熱器，佢話啱啱先同媽咪喺吉隆坡散心返嚟。楊恭如噚日心情唔錯，但係一問到同佢傳過緋聞嘅上海首富周正毅時，佢就即刻好嚴肅咁話：「我唔想講呢個問題。」
王馨平噚日同個女性朋友喺中環歎茶，佢話自從爆發非典型肺炎之後，自己都好少出街，佢話：「我差唔多日日都喺屋企舊山頂道活動，日頭就打網球，夜晚食飯就喺會所搞掂，唯一係出過一次埠去布吉玩，嗰日我上到飛機見到同機啲人都冇戴口罩，都即時除咗口罩。」
